فضل الرحمان دے بیان تے آرٹیکل 6دا مقدمہ ہونا چاہیدا اے: وزیراعظم عمران خان

اسلام آباد: وزیراعظم آکھیا اے مولانا فضل الرحمان دے خلاف آرٹیکل 6دے تحت مقدمہ چلنا چاہیدا اے، آزادی مارچ دے راہیں حکومت ڈیگن دی سازش کیتی گئی، فوج توں اوہی ڈردے نیں جہڑے کرپشن کردے نیں۔

میں کرپٹ آن نہ کسے دا ڈر اے۔ وزیراعظم عمران خان نے صحافیاں نال ملاقات وچ غیر رسمی گل کردیاں آکھیا آٹا بحران دی رپورٹ وچ جہانگیر ترین تے خسرو بختیار دا ناں نہیں، ملک وچ ہر تھاں مافیا اے، جہڑا قیمتاں مرضی نال کنٹرول کردا اے، مسابقتی کمیشن اپنا کردار ادا کرن وچ نکام رہیا، بجلی دی قیمتاں ہور نہیں ودھا سکدے، بجلی دی قیمت تے آئی ایم ایف نال معاملات طے پا ہو جان گے۔

عمران خان دا کہنا سی الیکشن اصلاحات لئی قوانین لیا رہے آں، الیکٹرانک ووٹنگ تے بائیو میٹرک سسٹم لازمی قرار دیواں گے، سینیٹ الیکشن خفیہ رائے شماری نال نہیں ہون گے، شو آف ہینڈز نال سینیٹ الیکشن دا قنون لیاواں گے۔

وزیراعظم ہورآکھیا میڈیا دے نال 40ورھے دا تعلق اے، مشرف نوں میں مشورہ دتا سی کہ ٹی وی چینلز کھولو، ٹی وی چینلز نال سب توں ودھ فائدہ میں چکیا، ڈیڑھ ورھے توں میرے اُتے ذاتی حملے کیتے گئے، کہڑے جمہوری ملک وچ وزیراعظم نوں ایس طرح نشانہ بنایا جاندا اے، اپنا سارا خرچ آپ برداشت کرنا آں، ملک تھلے نہیں جاوے گا تے آن والی نسلاں نوں نقصان ہووے گا۔