لہور ہائیکورٹ دا پلاسٹک بیگز دے استعمال تے پابندی یقینی بنان دا حکم

لہور: لہور ہائیکورٹ نے ڈیپارٹمنٹل سٹوراں وچ پلاسٹک بیگز دے استعمال دی پابندی تے عملدرآمد یقینی بنان دے احکامات جاری کر دتے، پلاسٹک مینو فیکچرز ایسوسی ایشن نوں مقدمے وچ فریق بنن دی ہدایت کردیاں سماعت اک ہفتے لئی ملتوی کر دتی۔

لہور ہائیکورٹ وچ ڈیپارٹمنٹل سٹوراں تے پلاسٹک بیگز دے استعمال دے خلاف کیس دی سماعت جسٹس شاہد کریم نے کیتی، ایڈووکیٹ سلمان خان نے موقف اختیار کیتا پلاسٹک بیگز دے استعمال نال ماحولیاتی آلودگی وچ وادھا ہو رہیا اے، پابندی لان تے پلاسٹک بیگز ایسوسی ایشن احتجاج کرکے حکومت نوں بلیک کردی اے۔

پلاسٹک مینو فیکچرز ایسوسی ایشن دے وکیل نے عدالت نوں مطلع کیتا کہ پلاسٹک بیگز تے پابندی دی وجہ توں کاروبار تباہ ہو رہیا اے۔

جسٹس شاہد کریم نے مینوفیکچرز ایسوسی ایشن دے وکیل نوں آکھیا تسیں مقدمے وچ فریق نہیں، اوہناں نوں فریق بنن دی ہدایت کردیاں فاضل جج نے ریمارکس دتے جہڑا احتجاج کردا اے کرے، عدالت پلاسٹک بیگز دے استعمال دی اجازت نہیں دیوے گی۔

عدالت نے محکمہ ماحولیات نوں پلاسٹک بیگز تے پابندی تے عملدرآمد کروان دا حکم دیندیاں کاروائی اک ہفتے تک ملتوی کر دتی۔

اپنا تبصرہ گھلو