پنجابی و اردو دے مہان شاعر، ادیب تے براڈ کاسٹر حسین شاد مرحوم دی تریجی برسی دی تقریب

رپورٹ: سید ذیشان گیلانی، علی عمران چٹھہ

پنجابی و اردو دے مہان شاعر، ادیب تے براڈ کاسٹر حسین شاد مرحوم دی تریجی برسی دی تقریب پنجابی یونین تے پنجابی میڈیا گروپ دے پربند ہیٹھ الحمرا ہال نمبر 3 وچ ہوئی۔ صدارت پنجابی دے معروف ادیب، شاعر دانشور تے حکومت پاکستان ولوں تمغہ حسن کارکردگی پائون والے پنجاب یونیورسٹی شعبہ پنجابی دے پہلے سربراہ پروفیسر ڈاکٹر شہباز ملک ہوراں کیتی۔ ہور مہماناں وچ فلم تے ٹی وی دے مشہور اداکار راشد محمود، پنجابی شاعر بابا نجمی، احمد رضا پنجابی، شاہدہ دلاور شاہ، ذبیح اللہ بلگن، سابق وفاقی سیکرٹری سید جاوید محمود سن جد کے مہمانِ خصوصی ڈی جی پیلاک ثمن رائے سن۔ تقریب دا آغاز تلاوت کلام پاک نال ہویا تے نعت رسول مقبولؐ دا شرف نیاز بالم نے حاصل کیتا۔ تقریب وچ مرحوم حسین شاد دے صاحبزادے تے سپیشل سیکرٹری محکمہ زراعت پنجاب وقار حسین شاد خصوصی طور تے مدعو سن۔ حاضرین مجلس نال خطاب کردے ہوئے پنجابی دے معروف ادیب تے پنجاب یونیورسٹی شعبہ پنجابی دے پہلے سربراہ پروفیسر ڈاکٹر شہباز ملک ہوراں آکھیا کہ حسین شاد اپنی ذات وچ انجمن سن۔ اوہ اِکو ویلے پنجابی تے اردو دے شاعر، ادیب ، دانشور، استاد تے براڈکاسٹر وی سن۔ریڈیو دے سامعین تے پنجابی ادب نوں پڑھن والے اوہناں نو ں صدیاں تیک یاد رکھن گے۔مرحوم حسین شاد اک شفیق انسان ، محقق دے علاوہ چنگے استاد وی سن۔اوہناں ہمیشہ نئے پنجابی ادیباں تے نوے لکھاریاں دی حوصلہ افزائی کیتی۔ اوہناں دا کلام اج وی پنجابی زبان وچ امتیازی حیثیت رکھدا اے تے نصابی کُتب دا حصہ اے۔ہُن ویلا اے کہ اسیں اوہناں دے لکھے ہوئے کالم ، ٹی وی سکرپٹس تے ناں چھپ سکن والا کلام اک نویں کتا دی صورت وچ چھاپ کے آئون والیاں نسلاں لئی محفوظ کر لیئے۔
مرحوم حسین شاد ہوراں نوں خراج عقیدت پیش کر دے ہویاں اُنکے صاحبزادے وقار حسین شاد نے کہا کہ اُنکے والدِ گرامی اک شفیق علمی شخصیت سن تے اوہ پنجابی زبان دے فروغ لئی آخر تک کوشش کر دے رہے۔ اوہناں دی آخری خواہش سی کہ اوہ کوئی نظم لکھدے لکھدے ایس جہاں توں ٹُر جائون۔ اوہ ہمیشہ آکھدے سن کہ پنجابی زبان نوں ذریعہ تعلیم بنائے بغیر ایہدی ترقی ناممکن اے۔ایس مو قعے تے اوہ اپنے والد گرامی دا تذکرہ کردے ہوئے آبدیدہ ہو گئے تے روندی آواز وچ ایہہ تقریب منعقد کرن تے چیئرمین پنجابی یونین مدثر اقبال بٹ ہوراں دا شکریہ ادا کیتا۔ اوہناں نے اپنے والد مرحوم دے کلام وچوں چونوے شعر تے غزلاں دے کجھ بند پڑھے تے آکھیا کہ ایہنے وڈے ادیب تے شاعر نوں تمغہ حسن کارکردگی نہ ملنا افسوس ناک اے۔ لیکن

میرے والد نوں عوامی پذیرائی ملنا میرے لئی باعث افتخار اے۔
تقریب نال خطاب کردیاں ڈی جی پیلاک ثمن رائے ہوراں آکھیا کہ پنجابی ادب دے فروغ لئی راولپنڈی تے ملتان ایف ایم 95 ریڈیو نشریات دا آغاز کر رہیا اے ۔ نشر ہون والے پروگراماں وچ اسیں حسین شاد ہوراں دا کیتا گیا کم دوبارہ توں براڈکاسٹ کراں گے۔ اوہناں آکھیا کہ مرحوم حسین شاد دی تمام تصانیف بے مثال نیں تے اوہناں دا ہر شعر نویں ادیباں لئی مثال اے تے ہر مصرعہ نویں امید دی دیوا بالدا اے۔ پنجابی زبان دے ودھا لئی اوہناں دی خدمات نوں رہندی دنیا تیک یاد رکھیا جائے گا۔اجہے لوک دنیا وچ بہت گھٹ آئوندے نیں۔ اسیں سوشل میڈیا دے ذریعے وی پنجابی ادب نوں اگے ودھان دی کوشش کر رہے آں۔
چیئرمین پنجابی یونین و پنجابی میڈیا گروپ مدثر قبال بٹ جو کہ مرحوم حسین شاد ہوراں دے انتہائی قریبی سنگی سن اوہناں آکھیا کہ حسین شاد دی وفات تے اج دا ایہہ اکٹھ اوہنا ں دی ادبی خدمات دا اعتراف اے ، اوہناں دی وفات نال پنجابی اد ب دا سنہرا باب بند ہو گیا اے۔ حسین شاد ہوراں ماں بولی پنجابی دے ودھا لئی بہت کوششاں کیتاں تے اسیں ایہناں کوششاں نوں رائیگاں نہیں جان دیاں گے تے ایہہ ودھا لئی ہر ممکن کوشش کراں گے تے کسے قربانی تو گریز نہیں کراں گے۔ نویں ادیباں واسطے مرحوم حسین شاد دا کلام مشعل راہ اے تے اوہ ایس گھپ ہنیرے وچ جُگنو وانگ سن۔
تقریب نال خطاب کردیاں ریٹائرڈ وفاقی سیکرٹری جیہڑی اوہناں دے متر وی سن سید جاوید محمود ہوراں آکھیا کہ پنجابیاں نیں اپنا ورثہ چھڈ دِتا اے۔ قیام پاکستان توں لے کہ اج تیک پنجابی نوں حقیقی معنیاں وچ اگے ودھن دا کوئی موقعی نہیں دتا گیا۔ پنجابی زبان نوں نصابی زبان بنائونا ای ایہدی اصل خدمت ہوئے گی۔حسین شاد ہوراں بارے گل کردیاں اوہناں آکھیا کہ اوہ بہت وڈھے شاعر تے اوس توں وی وڈھے انسان سن۔ اوہناں دیاں تحریراں تے شاعری اوہناں نوں ہمیشہ زندہ رکھے گی۔ اوہناں آکھیا کہ صوفیانہ شاعری دے ورثہ نال اج ساڈھی نوجوان نسل نوں روشناس کران دی لوڑ اے۔
جگ دُھمے پنجابی شاعر بابا نجمی ہوراں آکھیا کہ میری اوہناں نال یاری دہائیاں اُتے مشتمل اے۔ میرے اندر دے شاعر نوں پنجابی شاعری وَل لائون وچ حسین شاد ہوراں دا اہم کردار سی۔حسین شاد ہوراں جیہڑے کارنامے سر انجام دتے ہور کوئی نہیں کر سکدا۔ جنگ، نوائے وقت تے خبریں سمیت دوجے قومی اخباراں وچ پنجابی آرٹیکل لکھنا یا پنجابی ادب نوں جگہ دوانا کوئی معمولی کم نہیں۔ ایہہ کم اوہناں توں علاوہ ہور کوئی نہیں کر سکیا۔ اوہ پنجابی ماں بولی تے ورثہ دے امین سن۔ ایہہناں نوں عزت تے وقار ملنا ایہناں دا حق اے۔حسین شاد اج دے دور دا بہت وڈا شاعر سی تے پنجابی ادب دا علم بردار سی۔ اوہ ساڈے دِلاں وچ ہمیشہ زندہ رہن گے۔
معروف شاعرہ، مصنفہ پروفیسر شاہدہ دلاور شاہ نے حسین شاد لئی رکھے گئے ایس اکٹھ نال خطاب کردیاں آکھیا کہ مرحوم اک بلند پایہ شاعر ہون دے نال نال بہت وڈھے انسان وی سن۔ میرے لئی اوہ اک شفیق استاد سن تے اوہناں ہر موڑ تے میری ادبی راہنمائی کیتی تے میری پہلی کتاد دا دیباچہ وی لکھیا۔ اوہناں دیاں پنجابی لئی خدمات بہت زیادہ نیں۔ اوہ اپنے جونیئرز نوں وی سینئرز جنہاں مان دیندنے سن تے اوہنا ں اپنی ساری زندگی کسے دا دل نہیں دکھایا ۔ اوہ پنجابی دے اک لیجنڈ سن تے ساری عمر پنجابی دی خدمت کردے لنگا گئے۔اوہناں دی یاد وچ پنجابی یونین ولوں ایس با وقار تقریب دا اہتمام اوہناں دی ادبی خدمات نوں خراج تحسین پیش کرن دا بہترین طریقہ اے۔
پنجابی و اردو دے معروف شاعر جان کاشمیری ہوراں دی کہنا سی کہ حسین شاد اک سلجھے ہوئے شاعر سن اوہ پنجابی دے بہت وڈھے ادیب تے دانشور وی سن۔ میں ساری زندگی اوہناں توں وڈا شاعر نہیں ویکھیا۔ بلا شبہ دورِ حاضر دے سب توں وڈھے پنجابی شاعر تے لکھاری حسین شاد سن۔
حسین شاد ہوراں نال ایف ایم 95 تے کم کرن دا اعزاز حاصل کرن والی ۔۔۔ چودھری نظام الدین دی نونہہ تے معروف ریڈیو کلاکار غزالہ نظام ہوراں آکھیا کہ حسین شاد ہوراں نال کم کرنا میرے لئی اعزاز اے۔ اوہ اک بہت شفیق بزرگ تے میرے والد دی طرح سن۔ اوہناں ہمیشہ پروگرام بارے میری راہنمائی کیتی جیہدے نال میری فنی صلاحیتاںنوں اُجاگر ہون دا موقع ملیا۔
محترمہ غزالہ نظام نال رلدے ملدے جذبات دا اظہار کردے ہوئے حضر ت بابا سلطان باہوؒ دا کلام سُنا کے شہرت حاصل کرن والے اقبال باہو دے پُتر ندیم اقبال باہو نے آکھیا کہ حسین شاد نے میری صلاحیتاں نوں اجاگر کرن وچ میری معاونت کیتی میں اج جہڑے مقام تے آں ایہدی وجہ اوہ نیں۔ ندیم اقبال باہو نے حاضرین مجلس نوں عالم اسلام دی معروف روحانی شخصیت حضرت سلطان باہو دا عارفانہ کلام نال حسین شاد دی رغبت بارے وی دسیا۔ اوہناں نے حسین شاد دا عارفانہ کلام وی پیش کیتا۔ روزنامہ پوسٹ مارٹم دے ایڈیٹر ذبیح اللہ بلگن نے آکھیا حسین شاد دل موہ لین والی شخصیت سن بھانویں اوہناں دے نال چیف ایڈیٹر مدثر اقبال بٹ دے نال اوہناں دی کجھ ملاقاتاں ای ہوئیاں پر اوہ جہڑے خلوص تے محبت نال ملے انج لگدا سی کہ ساڈا صدیاں دا تعلق واسطہ اے۔ میں اوہناں نوں اک شفیق بزرگ تے بہت وڈے دانشور دے نال نال بہترین دوست وی پایا اوہ اج وی اپنے کلام دے حوالے نال زندہ نیں۔ احمد رضا جہڑے معروف پنجابی شاعر نیں، اوہناں نے مرحروم نوں خراج عقیدت پیش کردیاں آکھیا جتھے تے جدوں وی دور حاضر دے پنجابی ادب دی گل آوے گی اوتھے حسین شاد دا ناں پہلے آوے گا۔ڈاکٹر صغیر آصف جان نے حسین شاد دے تعزیتی ریفرنس نال خطاب کردیاں آکھیا استاد دامن منشا حیات تے حسین شاد بہت عظیم ادیب نیں۔ حسین شاد مرحوم نے انج تاں درجناں کتاباں وی لکھیاں پر میرے نزدیک ہیر رانجھا دی اردو ڈرامائی تشکیل اوہناں دا بہت وڈا کارنامہ اے۔ اوہ اینے وڈے ادیب شاعر تے محقق ہون دے باوجود بہت ملنسار تے عاجز بندے سن۔ تقریب نال خطاب کردیاں حاجی عبدالحمید نظامی نے حسین شاد نوں یاد کردیاں آکھیا اوہناں دے دنیا توں پردہ کر جان نال پنجابی ادب دے افق تے بہت وڈا خلا پیدا ہو گیا اے جہنوں پُر کرن لئی دہائیاں چاہیدیاں نیں۔معروف پنجابی ادیب سعید سکی نے آکھیا دوستاں تے کم دے نال کمٹمنٹ مثالی سی۔ اوہناں دے ٹیلی ویژن تے لکھے ہوئے ڈرامے سماج دی صحیح منظر کشی کردیاں اوہناں دا ہر شعر عوامی ہوندا۔ میرے نزدیک اوہ ساڈے قیاس توں وی وڈے قد آور ادیب سن۔ معروف ادیب حسین شاد نوں خراج عقیدت پیش کردیاں عمر عابد نے آکھیا اوہ اوہناں دا وفات دا تصور وی نہیں کر سکدے۔ اوہناں نے حسین شاد کلام وی پڑھ کے سنایا۔ معروف صحافی شاہد اقبال بھٹی نے آکھیا بھانویں حسین شاد نال نہ مل سکے پر اوہناں نے اوہناں دی تصانیف پڑھیاں نیں بلاشبہ اوہ اک بہترین ادیب تے شاعر سن اور براڈ کاسٹر دی حیثیت نال وی اوہناں نے پنجابی ادب واسطے بہت کم کیتا جہڑا مثالی اے میںوی اوہناں دے نقش قدم دے چل کے ماں بولی پنجابی دی ترویج تے فروغ لئی کم کراں گا۔ تقریب دے آخر وچ حسین شاد مرحوم دے کمسن پوتے عبداللہ حسین نے خراج عقیدت پیش کیتا۔

اپنا تبصرہ گھلو