امریکا طالبان معاہدے تے دستخط دی تقریب، قطری سفیر دی شاہ محمود نوں رلت دی دعوت

اسلام آباد: وزیر خارجہ نال قطری سفیر صقر بن مبارک نے ملاقات تے شاہ محمود قریشی نوں امریکا طالبان امن معاہدے تے دستخط دی تقریب وچ رلت دی دعوت دتی۔ امریکا طالبان امن معاہدے تے 29فروری نوں دوحہ وچ دستخط ہون گے۔ دعوت قطری ڈپٹی وزیراعظم تے وزیر خارجہ ولوں دتی گئی۔ قطری سفیر نے وزیر خارجہ شاہ محمود قریشی نوں خصوصی دعوت نامہ پیش کیتا۔

شاہ محمود قریشی دا کہنا سی پاکستان، امریکہ طالبان معاہدے بارے اعلان دا خیر مقدم کردا اے۔ پاکستان دا ہمیشہ توں موقف رہیا اے افغان تنازعے دا کوئی فوجی حل نہیں اے۔شاہ محمود قریشی دا کہنا سی افغان مفاہمتی عمل نوں اگے ودھان وچ پاکستان تے قطر دا کلیدی کردار اے، اج دنیا پاکستان دا موقف تسلیم کر رہی اے، پاکستان پُرامید اے کہ امن معاہدے تے دستخط انٹرا افغان مذاکرات ول لے جان گے۔