صدر ٹرمپ دی اک واری فیر مسئلہ کشمیر تے ثالثی دی پیشکش

نئی دہلی: امریکی صدر ٹرمپ نے وزیراعظم مودی نال ملاقات دے دوران پاکستان تے بھارت وچکار اک واری فیر مسئلہ کشمیر تے ثالثی دا کردار ادا کرن دی پیشکش کیتی اے۔ عالمی خبر رساں ادارے دے مطابق امریکی صدر ٹرمپ نے دورہ بھارت دے آخری دیہاڑ پریس کانفرنس وچ آکھیا وزیراعظم مودی نال ہون والی ملاقات وچ دہشت گردی سنے کئی معاملیاں تے سیر حاصل گل بات ہوئی اے جہدے وچ مسئلہ کشمیر نوں ترجیح حاصل رہی۔

صدر ٹرمپ نے ہور آکھیا امریکا دے پاکستان دینال چنگے تعلقات استوار نیں تے وزیراعظم عمران خان میرے دوست نیں ایس لئی جے مسئلہ کشمیر دے حل لئی میں کجھ کر سکنا آں تے ثالثی دا کردار ادا کرن نوں تیار آں۔ ایس موقع تے امریکی صدر دا ایہ وی کہنا سی بھارتی وزیراعظم مودی نال وی امریکا دے تعلقات چنگے نیں ایس لئی میں سمجھنا آں پاکستان تے بھارت وچکار کشمیر دے مسئلے دے حل لئی کردار ادا کر سکنا آں۔