کھیڈ وگاڑن والے فسادی لوک!

لکھت:شاہد ندیم احمد

چودھری شجاعت حسین نے میاں نوازشریف نوں پہلی واری وزیراعظم بنن تے اپنے اندر ’’میں‘‘ نہ لیان دا مشورہ دتا سی تے اج کل وزیراعظم عمران خان نوں فسادیاں توں بچن دا مشورہ دے رہے نیں۔ چودھری برادران حکومت نوں خبردار کر رہے نیں کہ فسادی اوہناں نوں اتحادیاں توں دور کر رہے نیں، پر ایہ واضح نہیں کر رہے کہ فسادی لوک کون نیں، جد کہ مولانا فضل الرحمان، چودھری برادران توں امانت دسن دی گل کر رہے نیں۔ چودھری برادران دیاں گلاں تے سیاست سمجھنا عام بندے دا کم نہیں، ایہ اوہناں دا خاصہ اے کہ کجھ ارکان اسمبلی دے نال پرویز مشرف دی سرپرستی وچ مسلم لیگ (ق) بنا کے پنجاب دی وزارت اعلیٰ تے ملک دی وزارت عظمیٰ حاصل کر لیندے نیں۔ شریف برادران کسے حد تک ایہناں نوں سمجھدے نیں، ایس لئی چکمہ دین وچ کامیاب ہو گئے سن، پر ایہدے بعد توں چودھری برادران وی وکٹ دے دوواں پاسے کھیڈن لگے نیں۔ اوہ دوبارہ وزارت اعلیٰ تے وزارت عظمیٰ حاصل کرن دے خواہش مند نیں، پر عمران خان پرویز مشرف بنن لئی تیار نہیں۔ عمران خان آپ اک منتخب وزیراعظم نیں، اوہناںنوں مجبوری وچ اتحادیاں دی لوڑ اے، پر سیاسی وساکھیاں دی لوڑ نہیں اے، حکومت دا کوئی اتحادی ایناں رولا نہیں پا رہیا جناں مسلم لیگ (ق) پا رہی اے۔ حکومت نوں وارننگ تے وارننگ دین دے نال بدعہدی دے الزامات لائے جا رہے نیں، پر وزیراعظم عمران خان ٹس توں مس نہیں ہو رہے، اوہناں ولوں اک گھڑا گھڑایا بیان آ جاندا اے کہ اتحادی گھبران نہیں ، کمیٹی فعال کر دتی گئی، اپنا کھیڈ جاری رکھو، ویلا آن تے اوہناں نوں مطمئن کر دتا جاوے گا۔تحریک انصاف حکومت ویلا لنگھن دے نال اتحادی جماعتاں دی سیاست سمجھن لگی اے، ایس لئی بلیک میل ہون دی بجائے عہد وفا دے دلاسے دے رہی اے جد کہ اتحادی حکومت دی سرد مہری نوں فسادیاں دا کیتاکرایا قرار دے رہے نیں۔ مسلم لیگ (ق) دے نزدیک فسادی بنیا بنایا کھیڈ وگاڑن والے لوک نیں، حکومت ولوں جہانگیر ترین دی سربراہی وچ بنن والی کمیٹی نال سارے معاملات خوش اسلوبی نال طے ہو گئے سن، پر ایہدی بجائے دوجی کمیٹی بنا دتی گئی، چودھری برادران دی نظر وچ جہانگیر ترین کمیٹی ختم کروا کے وزیراعظم نوں نویں کمیٹی بنان دا مشورہ دین والے فسادی نیں۔ جہانگیر ترین کجھ دناں لئی بیرون ملک گئے سن، اوہناں دی غیر موجودگی وچ ایہ ردوبدل کر دتا گیا۔ عمران خان تے جہانگیر ترین وچکار وی خلیج حائل ہو چکی سی جہڑی ملاقات دے بعد ختم ہو جاوے گی، پر شاید ایس خلیج دی وجہ وی کجھ فسادی وی سن، ایہ عمران خان لئی واقعی تشویش دی گل ہونی چاہیدی اے کہ کجھ لوک اینے کاریگر ہو چکے نیں کہ پُراعتماد دوستاں نوں وی ایہناں توں دور کر رہے نیں، ایس ویلے ملک وچ اک مگروں اک بحران دے پچھے کجھ نہ کجھ عوامل ضرور یں، چودھری برادران تے عمران خان دا اک دوجے توں دور ہونا معمولی گل نہیں، ایہ صرف ایس وجہ توں نہیں کہ فسادیاں نے کوئی کم وکھا دتا اے، سگوں پس پردہ کجھ نہ کجھ اجہے محرکات ضرور نیں کہ جہنے حکومت تے اتحادیاں وچکار اختلاف دے گل کھلائے نیں۔ایہ گل کسے توں لُکی نہیں اے کہ وزیراعلیٰ پنجاب بننا بہت سارے لوکاں دی خواہش سی، پر عثمان بزدار دے انتخاب دے بعد بہت سارے لوکاں دی مایوسی مخالفت وچ بدل گئی اے، ایس حوالے نال بہت ساری سازشی افواہوں گردش کردی رہندیاں نیں۔ جے اجہی سرگرمیاں پنجاب دے حوالے یاں مرکز دے حوالے نال ہون تے اوہناں دا گھر گھوم پھر چودھری برادران ول جان لگے تے عمران خان دا رویہ نارمل نہیں رہوے گا۔ چودھری برادران اک پاسے حکومت دے نال آخری دم تک بے غرض رہن دی یقین دہانیاں کرواندے نہیں تھکدے، جد کہ دوجے پاسے سوتن، فسادیاں جہی معنی خیز اصطلاحات استعمال کرکے پیغام وی اپڑ رہے نیں۔ چودھری برادران دی سوچ اتحاد نال پانسہ پلٹن وچ تبدیل ہون لگی اے، پنجاب دے سیٹ اپ وچ مسلم لیگ (ق) دی کلیدی اہمیت اے، پر ایہدے باوجود اوہناں دے حق وچ پانسہ نہیں پلٹ رہیا اے۔ پنجاب دے فیصلیاں وچ اوہناں نوں شامل نہیں کیتا جا رہیا، حتیٰ کہ پلس تے انتظامیہ نوں وی اوہناں دی پہنچ توں دور کر دتا گیا اے، ایس دوری دی وجہ مسلم لیگ (ن) تے پیپلزپارٹی نال پس پردہ ودھدی قربتاں نیں۔ چودھری برادران نوں ایہ گل سمجھنی چاہیدی اے کہ عمران خان دو وڈے برج پیپلزپارٹی تے مسلم لیگ (ن) نوں ڈیگ کے اقتدار وچ آئے نیں، اوہ پرویز مشرف دی طرح سیاسی حمایت توں محروم نہیں، سگوں ایس ویلے وی اوہناں نوں سب توں ودھ مقبولیت حاصل اے۔ جے کوئی اوہناں نوں سازشی تھیوری دے زیر اثر نمبر گیم توں متاثر کرنا چاہوے گا تے شاید اوہنوں کامیابی نہیں ہووے گی، کیوں جے عمران خان شراکت اقتدار دا کوئی اجیہا فارمولا وی نہیں چاہندے، جہدے نال اوہناں دا سیاسی ایجنڈا متاثر ہو کے ختم ہو جاوے، انج وی سیاسی تے مقتدر قوتاں واقعی اک پیج تے نیں تے کوئی آسمانی ساشارے وی کدھریوں نہیں مل رہے ، ایس صورتحال وچ پرویز الٰہی اپنا موازنہ عثمان بزدار دی بجائے شہباز شریف نال کرن لگن تے پنجاب وچ گورننس دے معاملے تے سنگین نوعیت دے سوالات کیتے تے ایہدا کیہ مطلب لیا جاوے گا؟ ایہ تے انج ای اے کہ جیویں اتحادی ہون دا لبادہ لے کے اپوزیشن دی تحریکاں دی پشت پناہی کیتی جا رہی اے۔ایہ امر واضح اے کہ مسلم لیگ (ق) دا کجھ سیٹاں دے نال مرکز تے پنجاب وچ کوئی کردار نہیں سی، تحریک انصاف حکومت دا اتحادی بنن نال چودھری پرویز الٰہی اک واری فیر پنجاب دی سیاست وچ اِن ہو گئے، اوہناں دی اہمیت ودھ گئی، اوہ سپیکر پنجاب اسمبلی بن کے اک وڈا آئینی و سرکاری عہدہ پا گئے نیں۔ عمران خان دے نقطہ نظر نال مسلم لیگ (ق) سیاسی استحقاق توں ودھ کے نوازا گیا اے۔ایہدے نال اوہناں نوں صوبائی تے وفاقی وزارتاں وی ملیاں نیں، پر پنجاب دی وزارت اعلیٰ جدوں اک واری کسے دے منہ نوں لگ جاوے تے فیر ایہدا ذائقہ ساری عمر ستاندا اے۔ ایہدے تے سونے تے سہاگہ کہ عمران خان نے اک نویں غیر تجربہ کار سیاسی نوجوان نوں پنجاب دا وزیراعلیٰ بنا دتا، ایہدے تے ایوان پنجاب وچ افواہواں پھیلائی گئیاں کہ پنجاب نوں سنبھالن لئی عمران خان پرویز الٰہی نوں وزیراعلیٰ بنان تے مجبور ہو جان گے، پر عمران خان اپنے کھڈاری دے خلاف سازشاں نوں بھانپ گئے سن، اوہناں نے سب تے واضح کر دتا کہ تحریک انصاف حکومت دے وزیراعلیٰ پنجاب عثمان بزدار ای رہن گے۔ ایہدے نال عمران خان نے وڈے پیمانے تے بیورو کریسی دے تبادلے کرکے سازشاں دے تابوت وچ آخری کیل وی ٹھونک دتی اے۔ تحریک انصاف حکومت دی خود اعتماد نوں متزلزل کرن لئی اک واری فیر مولانا فضل الرحمان متحرک ہون لگے نیں، اوہ پہلاں وی کسے دے اشاریاں تے متحرک ہو کے مقتدر قوتاں دی شفقت دے منتظر سن، ایس واری وی اشاریاں دے دست راست نیں، مولانا اک واری فیر پرانے موڈھے تے حکومت نوں گھر گھلن دا نکام کھیڈ کھیڈن لگے نیں، اوہ چودھری برادران نوں امانت وچ خیانت دا مشورہ دے رہے نیں پر ایس کھلری اپوزیشن دے کسے فسادی کھیڈ نال حکومت دے کن تے جون وی نہیں رینگے گی، سگوں حکومت سازشی افواہواں دی گرد وچ ڈگن دی بجائے مہنگائی دے بحران توں کڈھن وچ ضرور کامیاب ہو جاوے گی۔