ڈی سی گوجرانوالہ تے نوید بہار

لکھت:عتیق انور راجا

پچھلے دناں بہت سارے کالم نگار دوستاں دے نال قاسم علی شاہ صاحب نال ملاقات ہوئی تے شاہ صاحب نے فرمایا کہ شاعر، ادیب تے کالم نگار عوام دی سوچ بدلن وچ اہم کردار ادا کردے نیں تے جتھوں تک ہو سکے لوکاں دی سوچ نوں بدلن دی کوشش کرو۔لوکاں نوں آس دوان دی کوشش کرو۔ اپنے آلے دوالے رہن والیاں نوں ناامیدی توں کڈھو تے اوہناں نوں روشن کل دی نوید دیندے رہو۔ ایس واری موسم نے سردی دے سارے ریکارڈ بھن دتے۔ بڑے ٹھنڈے دناں دے بعد اج کل بہار دی آمد آمد اے ۔ دھپ وی چنگی نکل رہی اے تے اک واری فیر توں لوک زندگی ول پرت رہے نیں۔ دنیا دے بہت سارے ملکاں وچ سرد موسم دا عرصہ ساڈے توں ڈھیر ودھ ہوندا اے پر اوہ ملک ساڈے توں ترقی وچ کدھرے اگے نیں تے ایہدی وجہ ایہو اے کہ اوہ کم نوں ویلے تے کردے رہن تے یقین رکھدے نیں۔ پر ساڈے ایتھے سردیاں وچ روٹین دے بہت سارے کم رک جاند ے نیں۔ کوئی دو مہینے پہلاں جدوں موسم سرما اپنے جوبن تے سی، جدوں سورج دے درشن دن وچ بہت ای گھٹ ویلے لئی ہوندے سن، اسیں اک تقریب دا ارادہ کیتا تے ساڈے اک دوست پکار اٹھے راجہ صاحب اینے سرد موسم وچ تے کوئی تقریب رکھنی نہیں بن دی۔ کجھ دن انتظار کر لوو موسم چنگا ہو جاوے تے تقاریب دا سلسلہ جاری رکھنا۔ اسیں مختصر جیہا جواب دتا کہ حضور جے سرد موسم توں گورے وی ساڈی طرح ای ڈردے تے دنیا دے اک وڈے حصے تے تاج برطانیہ دا جھنڈا نہ لہرا پاندا۔ خیر اسیں ضروری تیاری دے بعد نوید بہار دے ناں توں اک مشاعرے دا دعوت نامہ تیار کرکے سوشل میڈیا تے سجا دتا۔
تقریب والے دیہاڑے سردی پہلاں توں وی کجھ ودھ سی۔ اسیں ویلے توں کجھ پہلاں ہال نوں اپڑے تے صدر مشاعرہ گورنمنٹ کالج دی پرنسپل نائلہ ریاض بٹ وی اپڑ گئیاں۔ اجے دو چار لوک ای سن۔ اوہناں دے دل وچ خیال آیا کہ شاید اج موسم ٹھنڈا ہون دی وجہ توں لوک نہ آ سکن تے اوہناں نے مینوں ہمت دوان لئی آکھیا عتیق بھائی پریشان نہ ہونا جے اج لوک گھٹ آئے یاں نہ وی آئے تے کوئی گل نہیں اسیں ایتھے بیٹھاں گے اک دوجے نوں کوساں گے تے زندگی دے رنگاں تے دل کھول کے گلاں کراں گے۔ ویلا کدوں رکدا اے جو اوس دیہاڑ رک جاندا اجے اسیں ایہ گلاں کر ای رہے ساں کہ دور وں نیڑیوں بہت سارے شاعر ہال وچ اپڑنا شروع ہو گئے تے جدوں ساڈے اُچیچے پروہنے وی ویلے تے تقریب وچ اپڑ گئے تے نائلہ ریاض بٹ نے آکھیا کہ واقعی ایہ نوید بہار اے کہ لوک موسم دی پروا کیتے بغیر ویلے دے پابندی نوں دھیان وچ رکھدیاں ہوئیاں اپڑ چکے نیں۔ ہال وچ موجود کرسیاں گھٹ پے گئیاں تے چیف لائبریرین ای لائبریری عمران صاحب نوں فالتو کرسیاں دا اہتمام کرنا پیا۔ اج کل بہار ای بہار اے۔ کدھرے پُھل کھلے نظر آندے نیں تے کدھرے معصوم بالاں دے مسکراندے چہرے دسدے نیں کہ جاڑا گیا ہن بہار اے ہن خوشیاں دی گل کیتی جاوے ہن آس دی گل کیتی جاوے۔ گوجرانوالہ وچ شاید پہلی واری صفائی مہم دا ہفتہ نہیں منایا جا رہیا اے سگوں واقعہ شہر دے بہت سارے حصیاں وچ صفائی نظر وی آ رہی اے۔ ڈپٹی کمشنر گوجرانوالہ جناب سہیل اشرف شہر و چ اک پاسے پرانی عمارتاں دی بحالی تے کم کر رہے نیں تے نال ای اوہ شہر دی خوبصورتی تے وی قابل قدر توجہ دے رہے نیں۔ کدھرے نویں پُھل پودے لگوا رہے نیں تے کدھرے سڑکاں تے پئے گندگی دے ڈھیراں نوں صاف کروایا جا رہیا اے۔ اجے کجھ مہینے پہلاں شہر دے بہت سارے علاقیاں توں لنگھدیاں تعفن دا اوہ احساس ہوندا سی کہ خدا دی پناہ۔ پر ہن بہت کجھ بہتر ہوندا نظر آ رہیا اے۔
اج کل بہار دا سماں پورے ملک وچ نظر آ رہیا اے۔ پاکستان بھر وچ کھیڈاں دے میدان آباد ہو رہے نیں۔ کبڈی ورلڈ کپ دے بعد اج کل پی ایس ایل دیاں رونقاں نال میرا ملک دنیا دی اکھاں دا تارہ بنیا ہویا اے۔ دسیا جا رہیا اے کہ اج کل پاکستان وچ سیاح پہلاں توں کدھرے ودھ آ رہے نیں۔ تے ایہناں حالات وچ گوجرانوالہ دی ضلعی حکومت توں آس اے کہ اوہ شہر دے تریخی تے قابل تفریح تھاواں دا چارٹ تیار کرکے شہر دے مین بائی پاساں تے نصب کروائے۔ گوجرانوالہ دے پہلواناں تے پکواناں دی اک دنیا معرتف اے تے کیہ چنگا ہووے کہ عزت مآب ڈپٹی کمشنر شہر وچ کشتی دے مقابلیاں دا اہتمام کروان تے کسے فوڈ گالا دا اہتمام وی کر دین۔ ادب شناس ڈپٹی کمشنر گوجرانوالہ نال جدوں ساڈی اک ملاقات ہوئی تے اوہناں نے ساڈے کولوں کتاب آپ طلب کیتی جہدے توں سانوں خوشی ہوئی کہ اج وی سرکاری افسر کتاب نال ایس قدر محبت رکھدے نیں۔ سانوں آس اے جناب کتاب دوستی دا عملی مظاہرہ کردیاں ہوئیاں شہر وچ کوئی کتاب میلہ وی منعقد کروان گے۔ نوجواناں نوں مثبت سرگرمیاں ول راغب کرنا اوہناں نوں ذمہ دار شہری بنان لئی بہت ضروری اے کہ بالاں دی تفریح ول خاص دھیان دتا جاوے۔ بالاں نوں دسیا جاوے کہ عملی زندگی وچ تعلیم دے نال ہنر دی وی بہت لوڑ پیندی اے تے فیر نوید بہار دی خوشبو نال نہ صرف چہرے سگوں روحواں مہکن لگن گیاں۔
فیر بنے گا پاکستان روشن پاکستان