وزیراعظم دی وڈے بجلی چوراں دے خلاف سخت کاروائی دی ہدایت

اسلام آباد: وزیراعظم عمران خان نے اعلیٰ سطح اجلاس وچ عوام نوں ریلیف دین دی ہدایت کردیاں آکھیا اے ودے بجلی چوراں نوں کسے صورت نہ چھڈیا جاوے تے اوہناں دے خلاف سخت توں سخت کاروائی کیتی جاوے۔وزیراعظم عمران خان دی زیر صدارت اعلیٰ سطح دا اجلاس ہویا جہدے وچ توانائی دے شعبے وچ عوام نوں ریلیف دین لئی حکومتی اقدامات دا جائزہ لیا گیا تے بجلی دی قیمتاں گھٹ کرن لئی چوری دی روک تھام بارے رپورٹ وی وزیراعظم نوں پیش کیتی گئی۔

اجلاس وچ وزیراعظم عمران خان نوں بریفنگ وچ دسیا گیا کجھ ہزار روپے بل دین والے بجلی چوراں توں کروڑاں روپے ریکور کر لئے گئے نیں تے ہن وی کریک ڈاؤن جاری اے تے ہزاراں بندیاں دے خلاف مقدمات درج کیتے گئے نیں۔ ایس موقع تے وزیراعظم عمران خان دا کہنا سی بجلی چوری دا خمیازہ غریب عوام کسے صورت برداشت نہیں کرے گی، وڈے بجلی چوراں نوں کسے صورت نہ چھڈیا جاوے۔

حکومت غریباں دے تحفظ تے کسے قسم دا سمجھوتہ نہیں کرے گی۔ وزیراعظم عمران خان نے حکام نوں ہور ہدایت کیتی کہ سیاسی مفاد نوں بالائے طاق رکھ کے غریب دا تحفظ کرو، پچھلے ادوار حکومت وچ بجلی چوری کرن والیاں نال رعایت ورتی گئی، وڈے چوراں تے ہتھ پان نال بجلی سستی ہون دا موقع ملے گا۔