پاکستان تے یورپی یونین وچکار اک کروڑ 30لکھ یورو دا معاہدہ

اسلام آباد: یورپی یونین تے پاکستان وچکار پبلک فنانشل مینجمنٹ لئی اک کروڑ 30لکھ یورو دا معاہدہ طے پا گیا اے۔ معاہدے دی ستاویزات تے سیکرٹری اقتصادی امور سید پرویز عباس تے یورپی یونین دی سفیر انڈرولہ کامینارا نے دستخط کیتے۔ معاہدے تے دستخط دی تقریب پچھلے دیہاڑ وزارت اقتصادی امور وچ منعقد ہوئی۔ ایس موقع تے وفاقی وزیر برائے اقتصادی امور حماد اظہر وی موجود سن۔

یورپی یونین دے نال طے پان والے معاہدے دے تحت یورپی یونین میکرو فسکل پالیسیاں، بجٹ تیاری دے عمل تے فور کاسٹنگ وچ بہتری لئی اک معاونت فراہم کرے گا جد کہ ایس موقع تے اظہار خیال کردیاں وفاقی وزیر برائے اقتصادی امور حماد اظہر آکھیا پبلک فنانشل سپورٹ پروگرام دی مدد نال نواں پاکستان منصوبے دے تحت ملک وچ معاشی تے معاشرتی ترقی نوں فروغ دتا جاوے گا تے پبلک فنانشل سپورٹ دا دائرہ کار سندھ، بلوچستان تے وفاقی سطح تے ہووے گا۔

اوہناں آکھیا سانوں ملک وچ مساوی معاشی و سماجی ترقی نوں یقینی بنانا اے، دیس دا معاشی استحکام حکومت دی اولین ترجیح اے جد کہ یورپی یونین نال معاشی و سماجی اشتراک جاری رہوے گا۔