ٍچینی دی قیمت مافیا نے اک واری فیر ودھا دتی، کریک ڈاؤن دا فیصلہ

لہور: چینی مافیا فیر میدان وچ آ گیا، ہول سیلرز نے چینی دی قیمت وچ خود ساختہ وادھا کر دتا۔ چینی دی فی کلو قیمت ہور دو روپے ودھا دتی، پرچون وچ چینی 85روپے فی کلو فروخت ہون لگی، ضلعی انتظامیہ نے منافع خوراں دے خلاف کریک ڈاؤن دا فیصلہ کر لیا۔

عوام شوگر مافیا توں پریشان، تھوک وچ چینی 2روپے فی کلو ہور مہنگی، ہول سیل مارکیٹ وچ چینی 75روپے 50پیسے توں ودھ کے 77روپے 50پیسے فی کلو ہو گئی۔ 100کلو چینی دا تھیلا 7700روپے وچ دستیاب، عوام دکاناں توں چینی 80توں 85روپے کلو خریدن تے مجبور ہو گئے۔ چینی دی قیمتاں وچ اک واری فیر وادھے تے شہری پھٹ پئے۔

کہندے نیں مہنگائی نے ہر شے نوں غریب دی پہنچ توں دور کر دتا۔ دوجے پاسے چینی دی قیمتاں وچ خود ساختہ وادھے تے ضلعی انتظامیہ دا کریک ڈاؤن دا فیصلہ، ڈپٹی کمشنر لہور دانش افضال دا کہنا اے ضلعی انتظامیہ نے چینی دی قیمت وچ کوئی وادھا نہیں کیتا۔ چینی دی فروخت شیڈول ریٹ دے مطابق ہووے گی، منافع خوراں دے خلاف کریک ڈاؤن کیتا جاوے گا۔