کرونا وائرس دی روک تھام، سرکار آئی ایم ایف توں اہم رعایت لین وچ کامیاب

اسلام آباد: مشیر خزانہ عبدالحفیظ شیخ آکھیا اے بین الاقوامی مالیاتی فنڈ (آئی ایم ایف) کرونا توں نبڑن لئی اضافی اخراجات خسارے وچ شامل نہ کرن تے راضی اے۔

اسلام آباد وچ میڈیا نال غیر ملکی گل بات وچ اوہناں دا کہنا سی وزیراعظم نے کرونا وائرس دے معاشی اثرات نال نبڑن دی حکمت عملی دی ذمہ داری سونپی اے۔

اسیں کرونا وائرس دی روک تھام لئی آئی ایم ایف توں اہم رعایت حاصل کرن وچ کامیاب ہو گئے آں۔ اوہناں دسیا کرونا وائرس تے آن والے اخراجات مالی خسارے وچ شامل نہیں ہون گے۔

اجہی حکمت عملی وضع کرن گے کہ معاشی سرگرمیاں متاثر نہ ہون۔ کوشش ہووے کہ اشیائے خورونوش دی قلت یاں قیمتاں وچ وادھا نہ ہووے۔

مشیر خزانہ آکھیا کوشش اے کرونا وائرس دی وجہ توں بیروزگاری دا خطرہ پیدا نہ ہووے۔ کساناں نوں وی اوہناں دی مصنوعات دا پورا معاوضہ ملدا اے۔ برآمدات متاثر ہون دا خدشہ ہویا تے معاہدیاں وچ توسیع دی کوشش کراں گے۔ پاکستان دی سٹاک مارکیٹ صرف دس توں گیارہ فیصد ڈگی اے۔

عبدالحفیظ شیخ دا کہنا سی دنیا دی سٹاک مارکیٹاں وچ 1ٹریلین ڈالر دی مندی آئی اے۔

کرونا دی روک تھام لئی وکھو وکھ ملکاں تے عالمی مالیاتی اداریاں توں مالی تے تکنیکی مدد لواں گے، جہڑا ملک ایس صورتحال توں نکل رہے نیں اوہناں توں وی مدد لئی جا سکدی اے۔