غیر ملکی کھڈاری وچ کورونا دی علامتاں پاروں پی ایس ایل ملتوی کیتا: وسیم خان

لہور: پی سی بی دے چیف ایگزیکٹو افسر وسیم خان آکھیا اے غیر ملکی کھڈاری وچ کورونا دی علامتاں پاروں پی ایس ایل ملتوی کیتا گیا۔

لہور وچ پریس کانفرنس دے دوران وسیم خان آکھیا کورونا پوری دنیا نوں متاثر کر رہیا اے تے کرکٹ بہت نکی گل اے، اسیں پی ایس ایل مکمل کران تے ایہدے نال منسلک سارے لوکاں دے تحفظ لئی بہت اقدامات کیتے، ایہدے لئی میچ وی گھٹ کیتے۔ اسیں سارے غیر ملکی کھڈاریاں نوں واپس جان دا آپشن دتا، اج میچز کھیڈن لئی تیار ساں، چاراں ٹیماں تیار سن تے فرنچائز نے وی کسے قسم دے تحفظات دا اظہار نہیں کیتا۔

وسیم خان دا کہنا سی اک غیر ملکی کھڈاری وچ کورونا دی علامتاں نیں، مشتبہ کھڈاری دا پتہ چلن دے بعد ایونٹ ملتوی کرن دا فیصلہ کیتا، پی ایس ایل میچز ملتوی کرن دا مقصد کھڈاریاں تے آفیشلز دا تحفظ اے، غیر ملکی کھڈاری وطن واپس جا چکیا اے، مشتبہ کھڈاری دا ناں ظاہر نہیں کراں گے۔

حالات بہتر ہون گے تے فرنچائزز نال گل بات دے بعد مقابلے ہون گے۔