کورونا وائرس پاروں پیپلزپارٹی نے ساری سیاسی سرگرمیاں معطل کر دتیاں

کراچی: پیپلزپارٹی ساری غیر ضروری سیاسی سرگرمیاں نوں معطل و موخر کر رہی اے۔ سماجی رابطے دی ویب سائٹ ٹوئٹر تے اپنی ٹویٹ وچ چیئرمین بلاول بھٹو زرداری نے اعلان کیتا کورونا وائرس دی صورتحال تے آگاہی دے حوالے نال اجلاس وچ رلت کیتی، سندھ حکومت دی آگاہی دے بعد ہر بندے دی حفاظت دے تناظر وچ مینوں اہم اعلان کرنا اے پیپلزپارٹی ساری غیر ضروری سیاسی سرگرمیاں نوں معطل و موخر کر رہی اے۔

چیئرمین پیپلزپارٹی دا کہنا سی 4اپریل نوں ذوالفقار علی بھٹو دی برسی دے سلسلے وچ ہون والا پارٹی دا سالانہ اجتماع وی موخر کر دتا گیا اے، کارکنان کورونا وائرس دی باء نال نبڑن لئی لوکاں دی مدد کرن، صوبائی حکومت دے نال تعاون کرن تے سماجی دوری دی مشق کرن دے نال آپ وی حفظان صحت دے اصولاں تے عمل کرن۔