اسٹیٹ بینک نے شرح سود وچ کمی کر دتی

اسٹیٹ بینک نے مانیٹری پالیسی بیان جاری کر دتا جہدے وچ شرح سود گھٹ کرکے 12اعشاریہ 5فیصد کر دتا اے۔

اسٹیٹ بینک ولوں جاری کیتی مانیٹری پالیسی بیان وچ آکھیا گیا مانیٹری پالیسی کمیٹی نے شرح سود 75بیسس پوائنٹ گھٹ کر دتا اے تے شرح سود 12.5فیصد مقرر کیتا گیا اے جد کہ ایس مالی ورھے افراط زر 11توں 12فیصد رہوے گا۔

اسٹیٹ بینک دا کہنا اے کورونا وائرس دی وجہ توں پاکستان دی معاشی ترقی دی شرح نمو وچ کمی ہووے گی تے مجموعی قومی پیداوار دی نمو 3فیصد رہوے گی، جد کہ کورونا وائرس توں پیدا ہون والی صورتحال دی وجہ توں نویں صنعتاں لان لئی 100ارب روپے دی نویں سکیم متعارف کرائی گئی اے۔

گورنر اسٹیٹ بینک نے مانیٹری پالیسی بیان تے میڈیا بریفنگ دیندیاں دسیا پاکستان دے زرمبادلہ دے ذخائر کورونا وائرس توں پیدا ہون والے حالات نال نبڑن لئی کافی نیں، اسٹیٹ بینک کرونا وائرس نال نبڑن لئی ہسپتالاں نوں 5ارب دے قرضے دیوے گا تے اک ہسپتال ودھ توں ودھ 20کروڑ قرضہ حاصل کر سکے گا، ایہ رقم کرونا وائرس نال نبڑن، ویکسین، وینٹی لیٹر تے دوجی ضروری شیواں دی خریداری لئی استعمال کیتی جا سکے گی۔