سیاسی تے عسکری قیادت کورونا وائرس نال نبڑن لئی اک پیج اُتے اے: وزیراعلیٰ پنجاب

لہور: وزیراعلیٰ پنجاب سردار عثمان بزدار نے ایس عزم دا اظہار کیتا اے کورونا وائرس دے خطریاں نال نبڑن لئی پاکستان دی عسکری تے سیاسی قیادت اک پیج اُتے ا ے۔

تفصیلات دے مطابق وزیراعلیٰ دی زیر صدارت اپیکس کمیٹی دا اہم اجلاس ہویا جہدے وچ کورونا وائرس نال نبڑن لئی اقدامات دا جائزہ لیا گیا۔

شرکاء نے مستقبل دے لائحہ عمل تے وی غور کیتا۔ اجلاس وچ کورونا وائرس دے خلاف ایکشن پلان تے موثر طور تے عملدرآمد تے اتفاق ہویا۔

شرکاء نے عوام نوں بچان لئی سارے ممکنہ وسائل بروئے کار لیان دے عزم دا اظہار کیتا۔ وزیراعلیٰ پنجاب عثمان بزدار دا کہنا سی سیاسی تے عسکری قیادت کرونا وائرس نال نبڑن لئی اک صفحے اُتے اے۔

غیر معمولی صورتحال نال نبڑن لئی غیر معمولی اقدامات ضروری ہوندے نیں۔ صوبے دے عوام دی زندگیاں مھفوظ بنان لئی آخری حد تک جاواں گے۔

کرونا دے خلاف جنگ جتن دے سوا کوئی آپشن نہیں، معاشرے دے ہر طبقے نوں کرونا وائرس نال نبڑن لئی اپنا کردار ادا کرنا اے۔کور کمانڈر لہور لیفٹیننٹ جنرل ماجد احسان دا کہنا سی ایہ اک نیشنل کاز اے تے اسیں سول حکومت دا پورا ساتھ دیواں گے۔ پنجاب حکومت کورونا وائرس نال نبڑن لئی موثر اقدامات کر رہی اے۔

حکومت دے نال ہر سطح تے تعاون کر رہے آں۔ عسکری قیادت ولوں سول حکومت نوں بھرپور تعاون دی یقین دہانی کرائی گئی۔

اجلاس وچ فیصلہ کیتا گیا کورونا توں بچاؤ لئی کیتے جان والے حکومتی اقدامات تے عملدرآمد یقینی بنایا جاوے ۔ عوام دی زندگیاں دی حفاظت لئی خلاف ورزی برداشت نہیں کیتی جاوے گی۔