کورونا وائرس دے نال نال دیس وچ ڈینگی دا خدشہ وی موجود اے: قمر زمان کائرہ

لہور: پیپلزپارٹی دے رہنما قمر زمان کائرہ آکھیا اے کورونا وائرس باہر توں آیا، سرکار نے ایئر پورٹاں سنے متعلقہ مقامات تے مناسب اقدامات نہیں کیتے، اجے تے ڈینگی دا خدشہ وی موجود اے۔ میڈیا نال گل کردیاں اوہناں دا کہنا سی جدوں توں ایہ حکومت آئی اے جنے وی کرائسز آئے ہر واری ایہناں دا رسپانس دیر نال آیا۔ ایہ وائرس باہر توں آیا سی تے ایئر پورٹاں سنے سب تھاواں تے سخت انتظامات کرن دی لوڑ سی۔ ایران بارڈر تے بہت دیر دے بعد اقدامات کیتے گئے۔ قمر زمان کائرہ دا کہنا سی سندھ حکومت ویلے سر حرکت وچ آئی تے ودھ کے اقدامات کیتے پر دوجے پاسے پنجاب حکومت مکمل طور تے چپ رہی۔ زائرین نوں رکھن دے انتظامات بہت گھٹیا سن۔ اوہناں آکھیا اجے تے ملک وچ ڈینگی پھیلن دا خدشہ وی موجود اے۔ وزیراعظم نوں مشورہ اے کہ وزیراعلیٰ سندھ نوں پنجاب دی دیکھ بھال دا وی کہہ دین۔ پنجاب حکومت عوام توں پہلاں قرنطینہ وچ آپ چلی گئی اے۔

اپنا تبصرہ گھلو