بھارت مقبوضہ کشمیر وچ کورونا وائرس بارے تفصیلات فراہم کرے: پاکستان

اسلام آباد: ترجمان دفتر خارجہ عائشہ فاروقی آکھیا اے پاکستان نوں مقبوضہ کشمیر وچ کورونا وائرس دے پھیلاؤ تے شدید تشویش اے ایہدے لئی بھارتی حکومت مقبوضہ وادی وچ کورونا وائرس دے حوالے نال تفصیلات فراہم کرے۔

دفتر خارجہ اسلام آباد وچ پریس بریفنگ دے دوران عائشہ فاروقی آکھیا پاکستان نوں مقبوضہ کشمیر وچ کورونا وائرس دے پھیلاؤ تے شدید تشویش اے، بھارت تے زور دینے آں کہ کروناپھیلاؤ دی وجہ توں مقبوضہ کشمیر وچ لاک ڈاؤن ختم کرے تے ضروری سپلائی یقینی بناوے۔

ترجمان آکھیا وزارت خارجہ نے کرونا دی روک تھام لئی اہم اقدامات کیتے نیں واک ان قونصلر سروسز بند کر دتی گئیاں نیں۔ وزارت خارجہ وچ خصوصی سیل قائم کر دتا گیا اے جہڑا دنیا بھر وچ پاکستانی سفارتخانیاں نال رابطے وچ اے جد کہ دفتر خارجہ وچ 24گھنٹے ہیلپ لائن قائم کر دتی اے۔

دنیا بھر وچ پاکستانی سفارتخانیاں نے اپنی کمیونٹی دی رہنمائی لئی فوکل پرسن مقرر کر دتے نیں، شہریاں دی بہتری لئی سارے ضروری اقدامات کیتے جا رہے نیں تے سارے شہریاں توں آکھیا اے حفاظتی اقدامات تے عملدرآمد یقینی بنان جد کہ میڈیا دا ایس حوالے نال اہم کردار اے۔