ایرانی صدر دی وزیراعظم پاکستان توں امریکی پابندیاں ہٹان لئی کردار دی عرضی

اسلام آباد: کرونا وائرس دی تباہ کاریاں تے مسلسل خراب ہوندی صورتحال پاروں ایران نے پاکستان توں مدد تے امریکی پابندیاں ہٹان لئی کردار ادا کرن دی عرضی کر دتی اے۔ ایرانی صدر حسن روحانی دا وزیراعظم عمران خان نوں خط۔ ایران تے لاگو پابندیاں دے خاتمے لئی کردار ادا کرن دی اپیل، پاکستان نے امریکا توں پابندیاں ختم کرن دا مطالبہ کر دتا۔

سفارتی وسیلیاں موجب 14مارچ نوں لکھے گئے خط وچ پاکستان توں کرونا وباء دے تناظر وچ امداد تے امریکی پابندیاں ختم کروان لئی سفارتی کوششاں تیز کرن دی عرضی کیتی گئی اے۔ خط دے تناظر وچ پاکستان نے امریکا توں پابندیاں ختم کرن دا مطالبہ کیتا اے جد کہ پاکستان ولوں ایران نوں مدد گھلن تے غور وی کیتا جا رہیا اے۔

وزیراعظم عمران خان نے 16مارچ نوں امریکی خبر رساں ادارے نوں دتے گئے انٹرویو وچ امریکا توں ایران تے لاگو پابندیاں ختم کرن دا مطالبہ کیتا سی، پاکستان ایران توں پابندیاں ہٹان لئی خاموش سفارتکاری تے پبلک اسٹانس، دوواں دا سہارا لے رہیا اے۔

اپنا تبصرہ گھلو