وفاقی وزیر فواد چودھری دا خود 3دیہاڑ لئی قرنطینہ کرن دا فیصلہ

اسلام آباد: وفاقی وزیر سائنس اینڈ ٹیکنالوجی فواد چودھری نے اپنے آپ نوں تن دیہاڑ لئی آئسولیشن وچ رکھن دا اعلان کر دتا اے۔ یاد رہوے فواد چودھری پچھلے دناں امریکہ دے دورے تے سن، اوہناں نے وطن واپسی تے فیصلہ کیتا اے کہ اوہ احتیاطی تدابیر تے عمل کرن گے۔

ایہدے پیش نظر اوہناں نے اپنے آپ نوں قرنطینہ کرن دا فیصلہ کیتا اے۔ وفاقی وزیر فواد چودھری آکھیا امریکا توں واپسی تے میں 3دیہاڑ لئی آئسولیشن وچ رہواں گا۔ ایس گل دا اعلان اوہناں نے سماجی رابطیاں دی ویب سائٹ ٹویٹر دے راہیں کیتا۔اپنے اک ہور ٹویٹ وچ اوہناں نے اٹلی وچ کرونا وائرس دے پھیلاؤ تے موتاں تے تیزی نال وادھے تے گہرے صدمے دا اظہار کردیاں آکھیا میرے کول الفاظ نہیں ایس دکھ تے اپنے جذبات بیان کر سکاں۔

فواد چودھری دا کہنا سی ایس دکھ تے سانحے تے پاکستان دے عوام اٹلی دی سرکار تے عوام دے نال نیں۔ ایہ ویلا لنگھ جاوے گا تے اٹلی دے عوام دے حوصلے تے عزم دی داستان تریخ وچ اک واری فیر لکھی جاوے گی۔ خدا تہاڈا حوصلہ اُچا رکھے۔