کرونا وائرس تے سردار عثمان بزدار

لکھت: فیاض الحسن چوہان
وزیر اطلاعات و ثقافت پنجاب

چین دے شہر ووہان توں اٹھن والی کرونا وائرس دی ہنیری نے ایس ویلے دنیا دے 180توں ودھ ملکاں نوں اپنی لپیٹ تے شکنجے وچ لے رکھیا اے۔ اوہ عالمی طاقتاں جہڑیاں مال و معیشت تے اسلحہ و ٹیکنالوجی وچ اپنا ثانی نہیں رکھدیاں سن، اج کرونا وائرس دے ساہمنے بھیگی بلی بنی نظر آ رہیاںنیں۔ کرونا وائرس دے شکاراں تے متاثرین وچ ترقی یافتہ ملکاں توں لے کے ترقی پذیر ملکاں، G-20توں لے کے سارک ملکاں تے امیر توں لے کے غریب ملکاں تک سارے دے سارے کرونا وائرس دے ساہمنے بے بس نظر آ رہے نیں۔کرونا وائرس دسمبر 2019وچ چین دے شہر ووہان توں نمودار ہویا تے اک خوفناک اژدھا دی طرح اپنے پھن پھیلاندا ہویا یکم جنوری 2020تک پورے چین دی آب و ہوا، بودوباش، ثقافت و معاشرت تے انسانی آبادی نوں اپنی لپیٹ وچ لے آیا۔ جنوری 2020نوں جدوں کرونا وائرس دے اثرات اجے چین توں باہر دے ملکاں نوں متاثر کرنا شروع نہیں ہوئے سن، اوس ویلے پنجاب دے وزیراعلیٰ سردار عثمان بزدار نے ایس معاملے نوں ٹیک اپ کیتا تے پنجاب دی بیورو کریسی تے اپنی کابینہ دے سینئر ممبراں نوں اعتماد وچ لینا شروع کیتا۔ بعد وں 14جنوری نوں وزیراعلیٰ پنجاب نے کرونا وائرس توں پنجاب دی عوام نوں محفوظ رکھن دے حوالے نال عملی تے بامقصد مشاورت کرن لئی پنجاب کابینہ دی اک کمیٹی تشکیل دتی۔ ایس کمیٹی دا بنیادی مقصد روزانہ دی بنیاد تے کرونا وائرس دا مقابلہ کرن تے پنجاب وچ ایہدے پھیلاؤ نوں روکن دے حوالے نال میٹنگ کرنا تے انتظامی، مالی تے تکنیکی بنیاداں تے ویلے سر فیصلے کرنا اے۔ ایس کمیٹی دی سربراہی وزیراعلیٰ پنجاب عثمان بزدار آپ کر رہے نیں۔ ایسے کمیٹی دی سفارشات دی روشنی وچ وزیراعلیٰ پنجاب نے فروری دے شروع وچ کرونا وائرس دے پھیلاؤ تے پنجاب دی عوام نوں ایس موذی مرض تے وباء توں بچان لئی 236ملین دے فوری فنڈز جاری کرن دا حکم دتا۔ ایس فنڈ دا مقصد پنجاب دے وکھو وکھ ضلعیاں دے سرکاری ہسپتالاں وچ قائم آئسولیشن وارڈز، ہائی ڈیپنڈنسی یونٹس تے قرنطینہ سنٹراں دا قیام سی۔ ایہدے علاوہ ایس فنڈ تے رقم نال فوری طور تے ٹیسٹنگ، کٹز، ڈاکٹراں تے پیرامیڈیکل سٹاف لئی حفاظتی لباس، حفاظتی ماسک تے دوجے فوری طبی آلات و اشیاء دی فوری خریداری مطلوب سی۔26جنوری نوں ایران توں آئے ہوئے زائرین وچوں پہلا کرونا وائرس دا مریض رپورٹ ہون دے بعد وزیراعلیٰ نے فوری طور تے ڈیرہ غازی خان وچ جتھے قرنطینہ سنٹر بنان دا حکم دتا، اوتھے محکمہ صحت پنجاب نے وزیراعلیٰ پنجاب دے حکم تے پورے صوبہ دے 36ضلعیاں دے ہسپتالاں وچ 41توں ودھ آئسولیشن سنٹرز تے ہائی ڈیپنڈنسی یونٹس دا قیام عمل وچ لیایا۔ فروری دے مہینے وچ ای پنجاب دے تن وڈے ہسپتالاں نوں کرونا وائرس دے علاج لئی مختص کر دتا گیا۔ ایہناں وچ جنوبی پنجاب دے ضلع مظفر گڑھ دا طیب اردگان ہسپتال، وسطی پنجاب وچ لہور دا پنجاب کڈنی لیور انسٹیٹیوٹ تے شمالی پنجاب وچ یورالوجی ہسپتال راولپنڈی شامل نیں۔مارچ دے شروع دناں وچ جدوں کرونا وائرس دے متاثرین تے مریضاں دی تعداد وچ وادھا ہون لگا تے وزیراعلیٰ پنجاب عثمان بزدار نے وزیراعظم عمران خان، وفاقی حکومت تے ورلڈ ہیلتھ آرگنائزیشن دی ہدایات دی روشنی وچ پنجاب کابینہ دی کمیٹی وچ انقلابی تے ہنگامی فیصلے کرنا شروع کر دتے جہناں وچوں کجھ بنیادی تے اہم فیصلے کیتے۔ وزیراعلیٰ پنجاب عثمان بزدار نے کرونا وائرس دے خلاف جنگ وچ فتح حاصل کرن لئی اپنا سرکاری ہیلی کاپٹر محکمہ صحت دے حوالے کر دتا تاں جے وزیر صحت، سیکرٹری ہیلتھ سنے محکمہ صحت دے دوجے افسراں تے اہلکاراں نوں اٹک توں رحیم یار خان تک ہنگامی نقل و حمل لئی مشکلات دا ساہمنا نہ کرنا پوے۔ وزیراعلیٰ پنجاب دی ہدایت تے صوبائی ڈیزاسٹر مینجمنٹ اتھارٹی (PDMA)دے زیر انتظام اک ارب نال قائم کیتے جان والے ہنگامی فنڈ نوں ہن 8ارب تک ودھا دتا گیا۔ وزیراعلیٰ پنجاب دی ہدایت تے فنانس ڈیپارٹمنٹ پنجاب حکومت بلوچستان نوں اک ارب روپے دی خطیر رقم فراہم کر رہیا اے جہدا مقصد تفتان وچ ایران توں آن والے زائرین لئی قائم کیتے گئے قرنطینہ سنٹر نوں جدید تے متحرک بنانا اے۔ وزیراعلیٰ پنجاب سردار عثمان بزدار نے ڈیرہ غازی خان وچ قائم قرنطینہ سنٹر دے حوالے نال میڈیا وچ آن والی خبراں دا نوٹس لیندیاں ہوئیاں وزیراعظم عمران خان دے نال ڈی جی خان دے قرنطینہ سنٹر دا دورہ کیتا تے ضروری طبی، مالی تے انتظامی ضرورتاں دی فراہمی دا فوری حکم دتا۔ وزیراعلیٰ پنجاب عثمان بزدار نے لہور ایکسپو سنٹر جوہر ٹاؤن نوں فوری طور تے کرونا وائرس دے حوالے نال فیلڈ ہسپتال بنان دا حکم دتا۔ وزیراعلیٰ پنجاب عثمان بزدار دی ہدایات دی روشنی وچ کرونا وائرس دے حوالے نال خدانخواستہ حالات وگڑن دی صورت وچ تے ہنگامی حالات دا مقابلہ کرن لئی میڈیکل سٹاف دی سہولت تے مریضاں دے رش وچ کمی لئی ٹیلی میڈیسن دی سہولت دا آغاز وی کر دتا گیا۔عالمی صحافتی ادارے گلف نیوز وچ محکمہ اطلاعات پنجاب دی فوکل پرسن برائے انگلش پرنٹ تے معروف کالم نگار مہر تارڑ نے بڑی خوبصورتی نال وزیراعلیٰ پنجاب عثمان بزدار دی کرونا وائرس دے خلاف جنگ وچ مثبت تے قائدانہ صلاحیتاں نوں اجاگر کیتا۔ ایہناں حالات وچ میری پاکستان دے سیاسی قائدین تے عمائدین توں دست بستہ گزارش اے کہ اج ایس دردناک صورتحال وچ کہ جدوں ترقی یافتہ تے مالدار ملکاں دی معیشاں دے حالات کرونا وائرس دی تباہ کاریاں نال مخدوچ ہو چکے نیں، سانوں اک متحد قوم دی حیثیت نال سارے سیاسی اختلافات بھلا کے پوری جرات، ہمت تے حوصلے نال کرونا وائرس دے خلاف جنگ نوں لڑنا اے۔روایتی سیاسی پوائنٹ سکورنگ تے تنقید توں اجتناب کردیاں ہوئیاں اک دوجے دے موڈھے نال موڈھا رلا کے پاکستان نوں ایہناں مخدوش عالمی صورتحال وچ سرخرو کرنا اے۔ میری پاکستان دے سارے میڈیا چینلز تے اخباراں دے مالکاں، صحافی برادری تے صحافتی تنظیماں توں وی گذارش اے کہ روایتی صحافت تے تنقید تے کرونا وائرس دے حوالے نال کسے قسم داPanicپھیلان توں گریز کردیاں ہوئیاں اپنے آپ نوں اک انتہائی مثبت قومی ادارے دے طور تے پیش کرنا اے۔ کرونا وائرس دے خلاف ایس عالمی جنگ وچ جے پاکستان دے حکمران، سیاستدان تے میڈیا مثبت انداز وچ اپنا کردار ادا کرن تے دنیا دی کوئی طاقت سانوں کرونا دے خلاف جنگ جتن توں نہیں روک سکدی۔ میری سوسائٹی وچ موجود نجائز منافع خوراں تے ذخیرہ اندوزاں توں وی گذارش اے کہ دنیا دا سب توں پہلا تے معتبر مذہب انسانیت اے۔ انسانیت نال کھلواڑ کرن والے ہر معاشرے، مذہب تے ملک دے دشمن جانے، مانے تے گردانے جاندے نیں۔اقتصادیات، معاشیات تے تجارت دے شعبے نال جڑے بندے سچے پاکستانی تے انسان دوست ہون دا ثبوت دیندیاں ہوئیاں کرونا وائرس دے خلاف جنگ وچ عوام تے حکومت دے شانہ بشانہ مثبت تے انسان دوست رویہ اختیار کرن۔آخری گل: پاکستان اوہ ملک تے ریاست اے جہنے 20ورھے دہشت گردی دی جنگ دا پوری جوانمردی، بہادری، استقلال تے صبر نال مقابلہ کیتا تے ایہنوں شکست فاش دتی۔ اج ایہ ساڈا فخر اے کہ امریکہ، یورپ تے مشرق وسطی دے ملکاں دے سیاسی تے فوجی سربراہان ساڈے وزیراعظم، چیف آف آرمی سٹاف تے سکیورٹی اداریاں توں گائیڈ لائن لین تے مجبور نیں کہ دہشت گردی دے خلاف جنگ و چ کیہ اقدامات، اصلاحات تے اعمال کیتے جان۔ ان شاء اللہ 21کروڑ پاکستانیاں دا ایہ گلدستہ اپنے قائد وزیراعظم عمران خان دی متحرک،چوکناتے باصلاحیت قیادت وچ معاشی و معاشرتی ترقی تے کامرانی نوں خوشبو نال ہمکنار رہوے گاتے کرونا وائرس دی وبا ایس گلدستے دی تروتازگی تے خوشبو نوں ماند نہیں کر سکے گی۔

اپنا تبصرہ گھلو