طالبان دا دور حکومت‘ اصل حقیقت

لکھت: اوریا مقبول جان

دنیا بھر دے اخبارات جس طرح مسلسل طالبان حکومت دے خلاف لکھدے رہے، ایناں زہریلا جھوٹھ تے سرد جنگ دے دوران سوویت یونین دے خلاف وی نہیں لکھیا گیا۔ ایسے جھوٹھ نوں پاکستان دا دانشور تے صحافی، حقیقت سمجھ کے اپنی رپورٹاں تے اپنے کالماں وچ اج تک استعمال کردا چلیا آ رہیا اے۔ ایس جھوٹھ وچ طالبان تے سب توں وڈا الزام ایہ لایا جاندا سی کہ اوہناں دی حکومت اک وسیع البنیاد حکومت نہیں اے۔ایہ صرف قندھار توں اٹھن والے سر پھرے پشتون طالبان نیں جہناں دے نال صرف پشتون نیں تے اوہ وی صرف سنی مسلک نال تعلق رکھن والے۔ ایہ اعتراض ایس جنگ زدہ افغانستان دے بارے وچ چکیا جاندا اے جہدے وچ تاجک، ازبک تے ہزارہ مل کے طالبان دور حکومت وچ اوہناں نال مسلسل جنگ کر رہے سن۔ جنگ وی اجہی کہ جہدے وچ امریکہ، بھارت تے ایران دی صرف مالی تے اسلحہ دی امداد ای شامل نہ سی سگوں جدوں مزار شریف تے طالبان نے قبضہ کیتا تے اوتھے گیارہ ایرانی پاسداران وی مارے گئے سن جہناں بارے ایران نے دعویٰ کیتا کہ ایہ اوہدے سفارتکار سن۔ ایہ بالکل اجہی ای گل اے کہ کل جے مظفر آباد وچ گیارہ بھارتی مارے جان تے بھارت ایہ دعویٰ کرے کہ اوہ دراصل ساڈے سفارتکار سن۔ ایسے واقعہ دے بعد ایران نے ہرات دے بارڈر تے فوج لیا کے کھڑی کر دتی سی تے سفارتکاراں دا انتقام لین دی دھمکیاں دینا شروع کر دتیاں سن۔ ایہناں حالات وچ ملاعمر مجاہد نے اک تریخی فقرہ آکھیا سی جہڑا اج وی اک حقیقت دے طور تے روشن اے کہ ’’افغانستان اک گوند دا تالاب اے جہڑا ایہدے وچ آیا واپس نہیں گیا۔‘‘ ایہدے بعد ایران مذاکرات دی میز تے آیا سی تے انتقام لین دے بجائے صرف ایرانی پاسداران دی لاشاں دی حوالگی تے مذاکرات ختم ہو گئے سن۔ اجہے ماحول وچ دنیا طالبان توں ایہ توقع رکھدی سی کہ اوہ اک وسیع البنیاد حکومت قائم کرن گے۔ پر ایہدے باوجود طالبان نے جس طرح اقلیتی گروہواں دے بندیاں تے دوجے مسالک دے لوکاں نوں حکومت وچ شامل کیتا، ایہدی ماضی وچ نظیر نہیں ملدی۔ کابل دی مرکزی حکومت وچ منصوبہ بندی، تعلیم تے سماجی بہبود دی وزارتاں بدخشانی فارسی خوان اقلیت دے ہتھ وچ سن۔ پشتون علاقیاں وچ فارسی بولن والے گورنر لان دا تصور تے کدی تریخ وچ وی نہیں سی، پر طالبان نے پشتون اکثریتی صوبہ پکتیا دے صوبے دا گورنر اک فارسی خوان نوں لایا۔ ایسے اقلیت دے زیر کنٹرول فوج دی اک انفنٹری ڈویژن سی جہدے وچ شیعہ مسلک دے سپاہیاں دی اکثریت سی تے اوہ طالبان دور حکومت وچ سینیاں دے نال رل کے اوہناں افغان گروہواں نال لڑدے سن جہناں نوں بیرونی ملکاں دی مدد حاصل سی۔ طالبان دے خلاف ایہ پروپیگنڈا مغربی اخباراں تے بھارت تے ایران دے پریس وچ ہوندا سی۔طالبان حکومت بارے عموماً ایہ تاثر دتا جاندا اے جیویں ایہ کجھ ’’ملا‘‘ سن جہناں نے اوتھے بزور قوت مخالف جہادی گروہواں دی آپس دی لڑائی ختم کروا کے امن تے قائم کر دتا سی، پر ایہ ’’جاہل طالبان‘‘ جدید طرزِ حکمرانی توں بالکل نابلد تے ناآشنا سن۔ اوہناں نوں جدید دور دے ریاستی امور نال کوئی سروکار نہیں سی۔ اک پسماندہ ملک اوہناں دے حوالے ہو گیا سی تے اوہناں نے انج ای رہن دتا بس چپ چاپ مسیتاں وچ درس دیندے رہے۔ ایس توں ودھ جھوٹھا تے بے بنیاد پروپیگنڈا نہیں ہو سکدا۔ طالبان نے حکومت وچ آندیاں ای سب توں پہلا اقدام ایہ کیتا کہ اوہناں نے پورے افغانستان نوں ٹیکس فری قرار دے دتا۔ ایس توں پہلاں افغان قوم نہ صرف حکومتی ٹیکس، سگوں بھتہ خوراں دے شکنجے وچ وی سی۔ صرف زکوٰۃ و عشر تے ٹیکس وصول کیتے جاندے سن۔ ایتھوں تک کہ مدتاں توں لاگو کسٹم ڈیوٹی (گرمک) تک ختم کر دتی گئی سی۔ سارے افغان جہادی گروہواں تے قبائلی سربراہواں دا اک مستقل ذریعہ آمدنی منشیات، خصوصاً پوست دی کاشت سی، جہدی آمدن نوں جہاد لئی استعمال کرن لئی فتوے وی دتے جاندے سن۔ او ویلے افغانستان وچ یورپ دے وڈے وڈے تاجر تے نائیجیریا، ایتھوپیا، صومالیہ تے سوڈان دے نکے نکے بیشمار سمگلر موجود سن تے ایہ کاروبار زوراں تے سی جہدی وجہ توں افغانستان وچ کنک دی تھاں پوست کاشت ہوندی سی۔ طالبان نے صرف اک حکم نامہ جاری کیتا تے دیا نے تسلیم کیتا کہ افغانستان جہڑا دیا وچ نوے فیصد افیون سپلائی کردا سی، اوتھے ایہدا بازار مکمل طور تے بند ہو گیا۔ طالبان نوں کھیڈاں دا دشمن بنا کے پیش کیتا جاندا اے کیوں جے اوہناں نے ’’بزکشی‘‘ ورگے خونی کھیڈ تے پابندی لائی سی تے ایہنوں افغان روایتاں تے حملہ تصور کیتا گیا۔ ایہ بالکل انج ای اے جیویں سپین وچ بل فائٹنگ تے پابندی لائی گئی سی۔ طالبان دے زمانے وچ فٹبال دے کھیڈ نوں بہت عروج ملیا۔ ایہدے تے وی یار لوکاں نے ایہ کہہ کے مذاق اڈایا کہ طالبان کسے نوں نیکر پا کے فٹبال کھیڈن نہیں دیندے۔ ڈریس کوڈ کسے قوم دا طرہ امتیاز ہوندا اے۔ ایہ اعتراض اوہ متعصب لوک لاندے نیں جہناں دے گالف کورٹ وچ کوئی کھڈاری جسم تے پورے کپڑے تے دور دی گل اے ننگے پیر وی نہیں وڑ سکدا۔ جدوں تک اوہ مخصوص جتی تے لباس نہ پاوے اوہدا داخلہ ممنوع ہوندا اے ۔ ایہو قنون پولو دے کھیڈ وچ گھڑ سواراں تے لاگو ہوندا اے۔ پر دنیا وچ مضحکہ صرف طالبان دا اڈایا جاندا اے کہ اوہناں نے فٹبال لئی پوری لتاں نوں ڈھکن دی شرطاں لاگو کردتیاں سی۔ ایسے مضحکہ خیز گل بات دا مقصد صرف طالبان دا سخت، درشت تے غیر مہذب چہرہ دنیا دے ساہمنے پیش کرنا مقصود سی۔ صحت دا شعبہ اجیہا سی جہنوں پندرہ سالہ جنگ نے بالکل اجاڑ کے رکھ دتا سی۔ پورے ملک وچ نہ ہسپتال سن تے نہ ڈاکٹرز۔ کابل یونیورسٹی دا میڈیکل کالج ورھیاں توں بند سی، جیویں کھولیا گیا۔ ایہدے نال خواتین لیڈی ڈاکٹراں دی تعلیم لئی وکھرا میڈیکل کالج قائم کیتا گیا جہنوں پاکستانی ڈاکٹراں نے قائم کیتا۔ ہر ضلع یا اولسوال وچ اک مستشفیٰ (نکا ہسپتال) قائم کیتا گیا جہڑا دراصل جنگ زدہ اجڑی عمارتاں دی تعمیر نوں توں ممکن ہویا۔ زراعت دے معاملے وچ اسلام دے ایس بنیادی اصول نوں مدنظر رکھیا گیا کہ پانی دا معاوضہ نہیں لیا جاوے گا۔ امن آیا تے اوہ افغان کارکن جہڑے ٹیوب ویل کھودن وچ شاندار مہارت رکھدے سن، جہناں نے پاکستان وچ ہجرت دے دوران کراچی توں کوئٹہ تے ژوب تک بلوچستان دی سرزمین ایسے فن نال سرسبز و شاداب بنا دتی سی، ایہ لوک واپس گئے تے اوہناں نے جابجا اپنی مہارت نال ہزاراں ٹیوب ویل کھودے۔ پوست دی کاشت ختم ہوئی تے کھیتاں وچ کنک اُگن لگی تے افغانستان اپنی تریخ وچ پہلی واری کنک وچ خود کفیل ہویا۔ پاکستانی سمگلراں دا کاروبار بند ہویا۔ سپن بولدک توں قندھار تک دا پورا راستہ شاید ای کسے نے ایس قدر سرسبز ویکھیا ہویاے۔ ننگر ہار وچ کامہ ڈیم، ہرات وچ سلمی ڈیم، لوگر دا چراغ والسوالی ڈیم تے مولانا زیارت ڈیم، سروبی ڈیم، امن وامان نہ ہون دی وجہ توں تباہ حال سن۔ تقریباً 20ورھے بعد نہراں تے کاریزات دی صفائی کروائی گئی تے آبپاشی دا نظام ٹھیک کیتا۔ افغانستان وچ پاکستان توں کھاد دی سمگلنگ اک بہت وڈا کاروبار سی ایہو وجہ اے کہ مزار شریف دا کھاد دا کارخانہ پاکستان سٹیل ملز دی طرح صرف 700تھیلے روزانہ بناندا سی جد کہ اوہدی اہلیت 4000تھیلے سی۔ ایہو کارخانہ ہن استعداد توں ودھ یعنی پنج ہزار تھیلے روزانہ بنا رہیا سی۔ دریائے ہلمند اوہ خوبصورت دریا اے جہدے آلے دوالے وسیع بے آباد علاقہ اے۔ دور دراز ہون تے ایران پاکستان بارڈر دی وجہ توں ایہدے تے کدی کوئی توجہ نہ دتی گئی۔ ایہدے تے کدی کوئی آبپاشی نہیں ہوئی سی۔ حیرت انگیز گل ایہ اے کہ ایس دریا توں دس کلومیٹر لمی نہر طالبان نے کدال تے بیلچے نال کھود کے علاقے نوں سرسبز کیتا۔ آبی ذخائر دی بدحالی تے جنگ دے ماحول دی وجہ توں ایہناں توں بجلی وی حاصل نہیں کیتی جا رہی سی۔ امن آیا تے طالبان نے نفلوڈیم، ماہبیر ڈیم، کجلی ڈیم، کامہ ڈیم تے اجہے گھٹ توں گھٹ بارہ ڈیماں نوں مرمت کیتا۔ نہراں جاری کیتیاں تے نفلو ڈیم توں100 میگاواٹ، سروبی توں 30 میگاواٹ تے ماہبیر توں 80 میگاواٹ بجلی حاصل کرنی شروع کیتی تے انج کابل تے جلال آباد دے شہر تے علاقے جہڑے حکمت یار تے احمد شاہ مسعود دی خانہ جنگی دی وجہ توںتاریکی وچ ڈوبے رہندے سن، روشن ہو گئے

اپنا تبصرہ گھلو