کورونا بے قابو،ملک وچ ریکارڈ 57 زندگیاں نگل گیا، 64 ہزار 28 متاثر

لہور: پاکستان وچ کورونا دے متاثرین تیزی نال ودھن لگے، ملک بھر وچ کورونا دے تصدیق شدہ کیسز دی تعداد 64 ہزار 28 تک پہنچ گئی جدکہ اک دن وچ 57 افراد جاں بحق ہوگئے جس دے بعد موتاں دی تعداد اک ہزار 317 ہوگئی۔

نیشنل کمانڈ اینڈ آپریشن سینٹر دے تازہ ترین اعدادوشمار دے مطابق گذرے 24 گھنٹیاں دے دوران 2636 نوے کیسز رپورٹ ہوئے، پنجاب وچ 22 ہزار 964، سندھ وچ 25 ہزار 309، خیبر پختونخوا وچ 8 ہزار 842، بلوچستان وچ 3 ہزار 928، گلگت بلتستان وچ 658، اسلام آباد وچ 2 ہزار 100 جدکہ آزاد کشمیر وچ 227 کیسز رپورٹ ہوئے۔

ملک بھر وچ ہن تک 5 لکھ 20 ہزار 17 افراد دے ٹیسٹ کیتے گئے، گذرے 24 گھنٹیاں دے دوران 11 ہز 931 نوے ٹیسٹ کیتے گئے، ہن تک 22 ہزار 305 مریض صحتیاب ہوچکے نیں جدکہ کئی مریضاں دی حالت تشویشناک اے۔

پاکستان وچ کورونا توں اک دن وچ 57 افراد جاں بحق ہوگئے جس دے بعد وائرس توں مرن والیاں دی تعداد اک ہزار 317 ہوگئی۔ سندھ وچ 396، پنجاب وچ 410، خیبر پختونخوا وچ 432، گلگت بلتستان وچ 9، بلوچستان وچ 43 تے اسلام آباد وچ 22 مریض جان توں ہتھ دھو بیٹھے۔ ہن تک 462 ہسپتالاں وچ قائم قرنطینہ مراکز مریضاں دا علاج جاری اے، انہاں ہسپتالاں وچ 7295 بیڈز کابندوبست کیتا گیا اے۔