دیس نوں جیویں لٹیا گیا ایہدے تے مٹی پائو والی پالیسی نہیں اپنائی جا سکدی: اجمل وزیر

پشاور: اجمل وزیر آکھیا اے دیس نوں جیویں لٹیا گیا ایہدے تے مٹی پائو والی پالیسی نہیں اپنائی جا سکدی، باہر توں پیسہ واپس لیائو تے غریب عوام دی مدد کرو، کرپشن کرن والیاں نوں حساب دینا پوے گا۔

مشیر اطلاعات خیبر پختونخوا اجمل وزیر دا میڈیا بریفنگ وچ کہنا سی عوام دا پیسہ لٹن والیاں نوں چاہیدا اے کہ عوام دا لٹیا ہویا پیسہ واپس لیا کے عوام نوں دین کیوں جے عوام ایس ویلے مشکل صورتحال توں لنگھ رہے نیں، عمران خان دی حکومت وچ سب نوں جواب دینا پوے گا، عوام دا پیسہ لٹن والیاں لئی کورونا نوں شیلٹر نہیں بنن دیواں گے، کمرے وچ بیٹھ کے لیپ ٹاپ دے راہیں تقریراں کرنا عوام دی خدمت نہیں اے۔

اجمل وزیر دا کہنا سی دکاناں کھلیاں رکھن وچ ہور اک دن تے اوقات کار وچ 2گھنٹے دی توسیع دتی گئی اے، کاروبار ہفتہ تے اتوار دے دن مکمل بند رہن گیاں، پہلاں توں ضروری قرار دتے گئے کاروبار تے دکاناں پورا ہفتہ شام 7وجے تک کھلیاں رہن گیاں۔

میڈیسن دی دکاناں، تندور، ہتھ ریڑی، دودھ دیاں دکاناں تے سپلائی چین پورا ہفتہ کھلی رہن گیاں۔