اک مسلم پروڈکشن ہائوس دی لوڑ

لکھت:اوریا مقبول جان

دنیا وچ کسے آمر، ڈکٹیٹر یا فرعون صفت حکمران نے وی اپنے مخالفین دی آوازاں نوں ایس قدر نہیں دبایا ہوئے گا جس قدر جدید سیکولر لبرل تے آزاد میڈیا نے اسلام، ایس دی عظمت رفتہ تے ایس دی نشاۃ ثانیہ دی علمبردار آوازاں دا گلا گھُٹیا اے، ایتھوں تیکر کہ ایہناں دا مکمل بائیکاٹ کیتا اے۔ آزادی اظہار دا علمبردار ایہہ میڈیا جدید دنیا دا سب توں وڈا فرعون اے، جیہڑا اپنے سیکولر، لبرل تے نیم فحش تصویر اظہار دے مقابلے وچ ذرا جہی اواز وی سننا پسند نہیں کردا تے 24گھنٹے اپنی مرضیدے خیالات، اپنے تصور زندگی تے اپنی اخلاقی پستی دا زہر عوام دے کناں وچ پاندا تے اکھاں دے رستے ذہن دے پردیاں نوں گندا کردا رہندا اے۔ پچھلے تقریباً 20 ورھیاں وچ پاکستان وچ ایس نو آزاد میڈیا نے ایہہ دعویٰ کیتا سی کہ اسیں عوام نوں اوہ کجھ وکھاواں گے جیہڑا اصل وچ عوام ویکھنا چاہندے نیں، ایس لئی کہ ماضی دے حکمراناں نے لوگاں نوں سچ نہیں وکھایا۔ پر اوہناں نے ایس دعوے دے برعکس نوں اپنا اوڑھنا بچھونا بنا لیا۔ مشرف حکومت دی لادینیت تے ورلڈ ٹریڈ سینٹر تے حملے دے بعد دہشت گردی دے خلاف عالمی جنگ دی برہنہ تلوار ایس آزاد میڈیا دے ہتھ وچ انج دی آئی تے اوہناں نے ہر ایس تصور نوں مسخ کرن دی کوشش کیتی جیہڑا مسلماناں دے دلاں تے اذہان وچ عظمت رفتہ دے روشن چراغاں وانگوں اج تیکر زندہ سی۔
حالات حاضرہ دے چینلاں تے اوہ ہر اواز دا جیہڑا مسلماناں دی غیرت و حمیت دی علمبردار سی، ایس دا ایہہ کہہ کہ بائیکاٹ کیتا گیا کہ ایس دے خیالات نفرت انگیز (Hate Speech) وچ آندے نیں، ایہہ متعصب چینل آپ نوں اک منصوبے دے تحت آزاد تے وسیع المشرب ثابت کرن لئی اسلام دے حوالے توں کمزور اوازاں، بیچارے معصوم علماء کرام تے جذباتی نوجواناں نوں بلا کے ایہناں دے لتیّ لیندے تے انج ایہناں نوں بے عزت کردے۔ ایس دی متعصب ترین مثال ایہہ وے کہ ’’کاروکاری‘‘ اصل وچ سندھی تہذیب دا معاملہ اے جس دا اسلام دی تعلیمات نال کوئی تعلق نہیں، ایسے طرح ’’سوارا‘‘ یا ’’خون کے بدلے عورتوں کا رشتہ‘‘اصل وچ پشتون تہذیب دا مسئلہ اے پر جدوں وی کدی کوئی انج دا واقعہ ہوندا، ایہہ ٹی وی اینکرز کسے سندھی قوم پرست نوں بلا کے رسوا نہیں کردے سن تے نہ ای کسے پشتون قوم پرست توں پشتو روایت دا پچھدے بلکہ مولویاں نوں بلا کے اسلام نوں رسوا کردے۔
حالات حاضرہ دے چینلاں دے آغاز تے ٹاک شوز دی آمد نے پاکستان وچ مقبول ترین ڈرامے دی صنعت نوں ایس قدر تباہ تے برباد کیتا کہ نوے دی دہائی وچ جیہڑے پرائیویٹ پروڈکشن اپنے عوج تے سی ایس دے ایواناں وچ مٹی اڈن لگی۔ لاتعداد ڈرامے ڈبیاں وچ بند ہو کے گوداماں دی زینت بن گئے۔ کجھ ورھیاں بعد جدوں ٹاک شوز ذرا اپنی جاذبیت تے افادیت کھون لگے تے ایس ملک دے سیکولر، لبرل تے مغرب زدہ طبقے نے اک خاص مہم دے تحت انج دیاں کہانیاں تے ڈرامے بنانا شروع کیتے جیہڑے خاندانی زندگی دی بربادی، مقدس رشتیاں دی پامالی تے نیم فحش مکالمیاں تے مبنی سن۔ ایس زہر آلود فضا توں ہولی ہولی لوگاں نوں اک انج دے معاشرے دے خواب وکھائے گئے جس وچ اسلام تے دور دی گل، خاندان دے مقدس رشتیاں دا احترام وی زیرہ زیرہ ہو کے رہ گیا تے لوگاں نوں مغرب زدہ اقدار تے ہندو زدہ تہذیب دا درس دتا جان لگیا۔
پاکستان وچ عوام دے جذبات توں کوساں دور لبرل، سیکولر تے الحاد پرست طبقے دی محنت اکثر برباد ہو جاندی اے۔ تقریباً چالی ورھے اوہناں نے بھارت تے پاکستان دے یکساں کلچر دی گل کیتی، واہگہ تے جا کے مشعلاں جلائیاں، انڈین ڈرامے وکھائے ایس تے مستزادیہ کہ ایہناں نوں انج دے مدد گار رائے اعظم وی ملے جیہڑے فخر نال کہندے سن کہ اسیں وی آلو گوشت کھانے آں تے بھارت والے وی، پر ایہہ ساری محنت ایس ویلے ضائع ہو گئی جدوں کلکتہ وچ بھارت میچ ہریا تے سٹیڈیم وچ اگ لا دتی گئی، احمد آباد وچ میچ ہریا تے سٹیڈیم خالی ہو گیا تے ہن تے ایہہ عالم اے کہ نریندر مودی نے سیکولر لبرل جمہوری نظام دا روز دار تھپڑ پاکستان دے ایہناں دے لبرل سیکولر چہرے تے انج دا جڑیا کہ ایہناں دے مونہہ توں گل نہیں نکل رہی۔ دوجے پاسے 20 سالہ مسلسل محنت سی جیہڑی ڈرامے تے فلم دے میدان وچ کیتی گئی۔ تازہ ترین ’’میرے پاس تم ہو‘‘ دا نشہ انج دا چڑھیا ہویا سی کہ سب سوچ رہے سن کہ ہن ایس تہذیب وگاڑن والے ڈرامے دی بانسری خوب وجے گی پر خلافت عثمانیہ دے بانی عثمان اول دے والد ارطغرل غازی تے مبنی ڈرامے دی پاکستانی ٹیلی ویژن تے اردو ڈبنگ دے نال نمائش نے ایہناں دی مقبولیت دے سارے محل ڈیگ دتے۔ ایس ڈرامے نوں ویکھن والے پی ٹیی وی دے مجبور ناظرین نہیں سن بلکہ ایہہ تے یوٹیوب تے ویکھن والے کمپیوٹر زدہ بندے سن ایہہ وہ سن جنہاں دے ذہناں نوں مدتاں زہر آلود کرن دی کوشش کیتی گئی سی ایس ڈرامے نوں یوٹیوب تے صرف 18 دناں وچ داہ کروڑ وار ویکھ کے عوام نے اک ریکارڈ قائم کر وکھایا۔ پی ٹی وی نے 18 اپریل نوں یوٹیوب چینل بنایا جس دے اک مہینے دے اندر 30لکھ سبسکرائبرز ہو گئے تے اک مہینے وچ اینوں 21 کروڑ وار ویکھیا گیا۔ ایس دی پہلی قسط ہن تیکر چار کروڑ وار ویکھی جا چکی اے۔ ایہہ ایس لئی ہویا کہ جدید سیکولر لبرل میڈیا دی آمریت نے جس طرح پاکستانی قوم دے دلاں وچ راج کردی مسلم امت دے ہیروز دا راہ روکیا سی، ارطغرل ڈرامے نے اوہ مصنوعی بند پاش پاش کر دتا۔ ارطغرل نے ثابت کر دتا کہ تسیں اک ہزار ورھے وی اپنے پراپیگنڈے دا زہر تے نیم فحش تہذیب دی چاشنی نال مسلماناں دے ذہن زہر آلود کرن دی کوشش کرو، ایہہ نہیں بدلدے، تہاڈی محنت ہمیشہ ضائع جائے گی۔
کیہ ایس امت وچ صرف اک ارطغرل اے جس دی شخصیت لوگاں دے دلاں دی دھڑکن بن سکدی سی۔ ساڈا دامن انج دی لازوال شخصیات نال بھریا پیا اے۔ کیہ اسیں صلیبی جنگاں دی تریخ تے فلماں تے ڈرامیاں دا سلسلا نہیں شروع کر سکدے۔ جس وچ یورپ دی بربریت تے صلاحح الدین ایوبی دے کردار دی عظمت نوں وکھائو۔ اج 20 ورھے پہلاں جدو قبائلی رسم و رواج تے میرا ڈرامہ سیریل گرد باد نشر ہویا تے ایس نوں کتابی صورت وچ چھاپدے ہوئے میں دیباچے وچ تحریر کیتا سی ’’اکثر ہوندا اے کہ جنہاں لوگاں نے سیریل ویکھیا ہوندا اے اوہ کتاب نہیں پڑھدے تے جیہڑے کتاب پڑھ لیندے نیں اوہ سیریل نہیں ویکھدے، پر کجھ انج دے وی نیں جیہ ڑے ایہہ دونویں کم کردے نیں۔ انج دے لوگ کسے اک فیصلے تے ضرور اپڑدے نیں۔ اوہ ایہہ کہ انج کہنہ مشق ہدایتکار ای سی نہیں تے تحریر وچ تے جان نہیں سی یا فیر ایہہ کہ ڈراما پڑ کے پتہ چلیا کہ اینوں کسے بہتر پیش کار دی لوڑ سی۔ 20 ورھے پہلے ایہہ میرا خاب سی کہ کوئی بہتر سہولتاں ڈرامے نوں میسر ہون پر اج ایہہ میری آرزو اے ‘‘۔ جے الیگزینڈر توں لے کے قلو پطرہ اورسیزر توں لے کے چنگیز خان تیکر مغرب دے ہالی ووڈ دا چہرہ اے تے عمر ابن خطاب ؓ توں لے کے خالدؓ بن ولید تے محمود غزنوی توں لے کے محمد بن قاسم تیکر ساڈی میراث نیں۔ کون اے جیہڑا اورنگزیب عالمگیر دے چہرے توں جھوٹی تریخ دا نقاب الٹن، محمد بن قاسم دے کردار توں پراپیگنڈے دا زہر ختم کرے۔ لوگ ایہہ سب ویکھنا چاہندے نیں۔ ایہہ جنگ میڈیا دی جنگ اے۔
اج دے دور دا ہتھیار میڈیا اے۔ جس طرح طالبان نے اک عالمی طاقت نوں ذلت آمیز شکست دتی اے انج دا جے کسی امریکی یا مغربی دنیا وچ ہویا ہوندا تے ملا محمد عمر توں لے کے مولانا ہیبت اللہ تیکر لا تعداد سیریل بن چکیاں ہوندیاں۔ کوئی ہے جیہڑا اپنے سرمائے دا رخ ایس پاسے موڑے تے اک مسلم پروڈکشن ہائوس دا آغاز کرے۔ یقین کرو ایہہ دنیا وچ وی گھاٹے دا سودا نہیں ہوئے گا تے آخرت دا اجر تے یقینی اے۔
٭٭٭