بلاعنوان

لکھت:آصف عنایت

کجھ واقعے اج شیئر کرنا واں اک پہلے ای کر چکیا واں کیوں جے ایہناں دا ساڈی معاشرت نال تعلق وی اے۔ حضرت باقی باللہ ؒ اپنے سرکار تے مال بازار وچ جاندے ہوئے سر توں سر دا کجھ ایس انداز نال رکھدے کہ اکھاں وی لُک جایا کردیاں تے زمین تے نظر رکھے لنگھ جاندے۔ اک دن اک مرید جیہڑا بوہت پچھیا کردا سی کہ قبلہ تسیں رومال انج کیوں رکھدے او ایس نے فیر پچھیا تے حضرت صاحب نے اپنا رومال اپنے سر توں لاہ کے ایس دے سر تے رکھ دتا ایس نوں بازار تے سڑک تے جان دکاناں تے بیٹھے لوگ جیہڑے نظر آ رہے یکدم رولا پا دتا کہ حضرت اوہ خنزیر، اوہ نیولا، اوہ کتا، اوہ گینڈا، اوہ سپ، اوہ بچھو، اوہ لومڑی جا رہے نیں ہجے رولا پا ای رہیا سی کہ حضرت نے رومال سر توں لاہ لیا۔ اصل وچ ایہہ حضرت دی کرامت سی صاحب بصیرت تے بصارت تے اہل نظر سن۔ لوگاں دی خصلتاں ایہناں دے چہریاں تے عیاں ہوندیاں نیں دہرے معیار تے کردار دے معاشریاں دی حالت زار دی جھلک ولی تے صوفی دے رومال دے تھلے عیاں ہو جایا کردی۔
اک بادشاہ سی ایس نے کسے ملک تے چڑھائی کیتی تے پہلا شہر فتح کیتا۔ قیدی عورتاں نوں حکم دتا کہ کپڑے لاہ دیو، نگا نچو، تعمیل ہو گئی فیر حکم دتا کہ زنانیاں کپڑے پا لوئو عورتاں تے مرداںسب نوں معمول دی زندگی لنگھان دی اجازت اے چلے جائو۔ اگلے دن فوج نوں کہیا باقی دا ملک فتح کرو کوئی بندہ زرہ پان تے تلوار نیام توں کڈن دی زحمت نہ کرے، سپہ سالار نے کہیا شہنشاہ ایس طرح تے نقصان ہو جائے گا۔ شہنشاہ نے کہیا کہ نہیں اوہ میں کل تسلی کر دتی۔ ایتھے تیکر کہ حاکماں نے اپنے عوام تے اینے ظلم تے ظلم توں ودھ عزت نفس نوں ایس حد تیکر پامال کیتا اے کہ کل اک وی زنانی نے مزاحمت نہیں کیتی نہ کسے بندے دی حمیت ای ظاہر ہوئی تاں ہن ایس ملک تے قبضہ کرن لئی پیش قدمی نوں چہل قدم ای سمجھو۔
کرنل دی بیوی ایویں ٹاپ ٹرینڈ بن گئی جد کہ بھٹو صاحب، بی بی صاحبہ توں بعد اٹ نال اٹ وجان والے زرداری تے ’’مجھے کیوں نکالا‘‘ دا سوال کرن والے نواز شریف دے نال جیہڑا ہو چکیا میدان صاف تے موجودہ حکومت اپنے ای وعدیاں دے بوجھ تھلے کراہ رہی اے تاں میدان صاف اے ایتھے ہر حکمران چہرے بدلن لئی پیش قدمی، چہل قدمی وچ نہیں صرف اک الیکشن دی شوٹنگ ہونا ہوندی اے۔شیخ رشید برانڈ لوگ ای نظر آندے رہن گے جدوں تیکر عوام تے انج دے لوگ قبراں نہ ویکھ لین۔ میری ای کتاب توں اقتباسا پیش کیتے یندے نیں شکار دے مشغلیاں وچ شیر دا شکار قابل فخر مشغلہ اے۔ جے شیر مار کے ایس دی کھل نسل در نسل گھر دے ڈرائنگ روم وچ سجائے رکھے تے خاندانی مشغلہ تے جے شیر انساناں نوں پنجہ مار دیوے یا جبڑیاں وچ لے لوے تے کدی منطقی انجام نوں اپڑا دیوے تے ایس دی درندگی اے۔ کہن دا مطلب اے کہ انسان شیر مار لئے تے شیر افگن تے جے شیر پنجہ مار کے انسان نوں فضلے وچ تبدیل کر دیوے تے ایس دی درندگی ۔
الحمدللہ ساڈے نال وی کجھ انج دا ای سلسلا رہیا اے۔ ساڈے توں جیہڑا مرضی جفا کر لوے اوہ حق اے تے جے کدی پلٹ کے اسیں جواب دے دیئے تے ایہہ ساڈی بدتمیزی، بد اخلاقی، واہیاتی اے۔ حضرت علی علیہ السلام نے فرمایا کہ جے تسیں لوگاں نوں اک دوجے دی نیت دا علم ہو جائے تے اک دوجے دے جنازے نہ پڑھو فیر دوجی تھاں فرمایا کہ اک دوجے دیاں گردناں مار لوئو۔ ظاہر باطن اک ہون وچ بوہت آسانیاں نیں۔ مذہبی روپ دھارن توں کوئی متقی نہیں ہو جاندا جویں میں ہمیشہ احتجاج کرنا واں کہ حضرت علی ؑ نے ای فرمایا سی زہد دا مخفی ہونا زہد اے (فرض عبادت توں علاوہ) اج جدھر رکشیاں، چوکاں، چوراہواں وچ قصاب گلی داڑھیاں تے کلف لگی پگڑیاں، عمامیاں وچ مولانا اکھوان والے تے علماء تے پیشوا اکھوان والے اپنی تصویراں تے گروپ دی شکل وچ آویزاں تے چسپاں کیتے ہوئے نیں۔ کدی فلمی اداکار تے سٹیج اداکار یا بیرون ملک جان والے طائفے انج دیاں تصویراں تے فلیکس شیٹس لوایا کردے سن۔ معاشرت دی بدصورتی دا عالم ویکھو کہ ساڈا کیہڑا طبقہ اے جیہڑا پر فارم ہوئے جا رہیا اے۔
اصل وچ جدوں سہن تے آ ای جائیے تے فیر کیہ فرق پیندا اے کہ کس دی چوکھٹ تے سر رکھ دتا۔
ہوا جبغم سے یوں بے حس تو غم کیا سر کے کٹنے کا
نہ ہوتا گرجداتن سے توزانو پر دھرا ہوتا
جیہڑا سر کٹے گا نہیں زانو تے دھریا ہوئے گا۔ مسٹر عدنان مندریس، قبلہ شاہ فیصل، جناب ذوالفقار علی بھٹو، محترمہ بے نظیر بھٹو توں لے کے اج تیکر ایس ڈگر دے لوگاں دی اک داستان اے تے دوجے پاسے جسٹس منیر توں لے کے ثاقب نثار تیکر تے فیر شیخ رشید جہے نابغہ اقتدار دی اک داستان اے۔ 1977ء توں اک ای دھن وچ پوری قوم مگن اے کہ بس فلاں ہون جا رہیا اے کہ حکومت گئی تے فلاں آ رہیاں اے ایس آن جان وچ حمایتی تے مخالفین مگن رہن پر منزل دور توں دور ہوندی چلی گئی ۔ کدوں ایہہ دائرے دا سفر ختم ہوئے تے کدوں قوم دائرے توں نکل کے صراط مستقیم تے آئے گی۔
آخر وچ اک آیت اللہ خمینی دا واقعہ اے کہ ایہناں توں اک وطن عزیز ’’مولانا‘‘ صاحبان دا اک گروپ ملن دی غرض نال گیا۔ آیت اللہ جس تھاں تے بیٹھے سن اوہ چبوترا جہیا سی شاید ٹوٹل تھاں 10 مرلے ہوئے جس وچ چبوترا دو تن مرلے دا ہوئے گا۔ کوئی کرسی نہیں سی سب فرش تے بیٹھے ہوندے سن بس اک وار فرانس دا سفیر آیا تے ایس لئی محلے دے کسے گھر توں کرسی منگوائی گئی ایس لئی نہیں کہ آیت اللہ نے اوتھے جلاوطنی گزاری سی بلکہ ایس لئی کہ ایس دی لت وچ سریا سی جس دی وجہ نال اوہ زمین تے نہیں بہہ سکدا سی۔ جدوں پاکستانی علماء تے مولانا صاحب دی واری آئی تے آیت اللہ نے اپنے سیکرٹری دے کن وچ پچھیا کہ ایہہ ویلا تے پاکستانی علماء لئی مقرر نہیں سی اوہ بولے کہ ایہو نیں تے آیت اللہ نے رتے چہرے ، بے سائز گردناں تے تونداں مسوڑیاں دی نمائش کردی ہوئیاں مسکراہٹاں ویکھیاں کہ ایہہ مذہبی رہنما نیں پاکستان دا تے مذہب دے حوالے نال بڑا چرچہ اے۔ ایہناں دے چہرے تے خوف خدا تے ذمہ داری توں پیلے جد کہ زہد و عبادت نال پیٹ کمر دے نال ہونے چاہیدے سن جے ایہہ علماء نیں تے میں ایہناں نال ملاقات نہیں کراں گا تے آیت اللہ نے ملاقات نہیں کیتی سی۔ ا وی ایہو عالم اے اللہ والے دے کول لوگ جاندے اللہ والے اقتدار دی راہداریاں وچ نہیں پائے جاندے۔طیارہ حادثہ تے پھُٹی ہوئی وباء دی وجہ نال دنیا دی عید سوگ اے۔اللہ کریم دنیا دے انساناں نوں دکھاں توں نجات عطا فرمائے تے کدی انج دی عیدفیر نہ آئے کہ زندہ وی ہون تے گلے نہ مل سکن۔ وزیراعظم تغرل دی بجائے اپنی پرانی تقریراں دی ویڈیوز ویکھ لیندے تے قوم دا بھلا ہو جائے۔
٭٭٭