بانسری دا دوجا سرا

لکھت: آصف عنایت


مولانا جلال الدین رومیؒ دے دوجے پتر علائو الدین جیہڑے حضرت شاہ شمس تبریزی ؒ نال بغض رکھدے، ایس حد تیکر کہ 649ہجری وچ حضرت شمس تبریزیؒ نوں قت ل ای کر دتا جس توں بعد حضرت مولانا رومیؒ ایہناں دی محبت وچ فنائیت دی حد تیکر غرق ہو گئے کہ ہر شے توں لا تعلق ہو گئے آخر کار ایہناں دی ایس محویت نوں حسام الدین ضیاء الحق چلپیؒ نے اپنی بے پناہ محبت دے ذریعے توڑیا ایہہ حسان الدینؒ ای سن جنہاں نے مولانا رومیؒ توں مثنوی جہیا شہرہ آفاق نسخہ کتاب دی صورت لکھوایا۔ مثنوی وچ حسام الدین دا بڑا ذکر اے۔ مولاناؒ فرماندے نیں کہ مثنوی پڑھن والا انسان جے فقر دے کمال نوں نہ وی اپڑے فیر وی شیطان دے ہتھ کنڈیاں توں ضرور محفوظ رہندا اے قونیہ ترکی دی آرام فرما مولانا رومیؒ دے فکر و تصوف دا سفر جاری اے تے جاری رہوے گا۔ مولانا ؒ دی تقلید و چشم تصور دی محفل نے محمد اقبال نوں حضرت ڈاکٹر علامہ محمد اقبالؒ بنا دتا۔ مولانا دے بعد علامہ صاحب امہ وچ انج دے صاحب تصوف ہستی ہوئے جنہاں نوں پڑھ کے ایران دے ڈاکٹر علی شریعتیؒ جیہڑے انقلاب ایران دے نقیب سن جہے علامہؒ صاحب تصور پاکستان دے بانی نیں، انتہائی صوفی درویش جناب ڈاکٹر جہانگیر تہمیؒ نے اگے حضرت علامہ اقبال توں فیض پایا۔
مرزا امتیاز بیگ (بھولی) وزیر آباد، حاجی محمد سعید بھٹو صاحب (گوجرانوالہ)، محمد ایوب خان (مصلی)، گوجرانوالہ تے میرے احقر دے نال خصوصی نشست رہی۔ میرے ایہناں نال خاندانی مراسم رہے۔ آخری ویلے وچ تمیمی صاحب 1نمبر ہاسٹل وچ جس کمرے وچ رہندے سن اوہ اک درویش دا حجرہ بن چکیا سی۔ دور نہ جائو رضا ریا بیورو کریسی دی منزلاں طے کردے ہوئے مولانا رومیؒ دی تحریراں توں لنگھدے تے اج ممتاز دانشور رضا رومی دے نامی توں جانے جاندے نیں۔
مولانا فرماندے نیں روح دا تعلق جسم نال اے تے خدا دا مخلوقات دے نال مثال دے طور تے جے انسان دی صفت انسانیت فنا ہو جائے تے اوہ صفات الٰہی دا مظہر بن جاندا اے۔ علامہ صاحبؒ فرماندے نیں کہ طریقت یعنی تصوف ایہہ اے کہ انسان تہ قلب وچ احکام شرعی دی حقانیت تے صداقت دا احساس کرے۔ ایہہ صوفیاء لوگاں دا موضوع انسان دی روح تے ایس دا اپنی اصل دے جڑے ہون نال اے۔ اصل کیہ اے اوہ ای اے جس دا اظہار اے۔ مولانا رومی اپنی حکایت وچ فرماندے نیں بانسری توں سن کیہ حکایت بیان کردی اے تے جدائیاں دی شکایت کردی اے کہ جدوں مینوں بنسلی توں کٹیا میرے نالوں توں مرد تے عورت سب روندے نیں میں انج دا سینہ چٹنی آں جیہڑا جدائی نال پارہ پارہ ہوندا کہ میں عشق دے درد دی تفصیل سنائواں جیہڑا کوئی اپنی اصل توں دور ہو جاندا اے اوہ اپنے وصل دا زمانہ فیر لبھدا، میں مجمع وچ روئی خوش اوقات تے بد احوال لوگاںوچ رہی ہر بندا اپنے احوال دے مطابق میرا یار بنیا پر میرے اندر توں میرے رازاں دی جستجو نہیں کیتی میرا راز میرے نالوں توں دور نہیں پر اکھ تے کن وچ اوہ نور موجود نہیں۔
بانسری زہر وی اے تے تریاق وی۔ بانسری خطرناک رستے دی گل کردی اے یعنی مجنوں دے عشق دے قصے بیان کردی اے۔ بانسری وانگوں گویا اسیں اوہ مونہہ رکھنے آں۔ اک بجان والے دے لباں وچ لُکیا اے (اہل تصوف لئی اللہ /حق) جہے بانسری دا اک مونہہ وجان والے دے مونہہ وچ لُکیا ہوندا اے تے ایسے طرح دوجے مونہہ توں جیہڑا آواز آندی اے اصل وچ اوہ وجان والے دی ای ہوندی اے۔
جنہوں اکھ میسر اے اوہ جاندا اے کہ ایہہ تے اہل تصوف لئی سمجھن دی گل اے ہن ایسے حوالے نال جے دنیا داری وچ ویکھیے تے حقیقی ریاست مدینہ دے خلفائے راشدین دی بانسری دی اواز دوجے پاسے اصل وچ میرے آقا کریم ﷺ تے پروردگار دے احکامات نال لگی ہوئی سی۔ دنیا ایسے اواز نوں سن دی سی ایہناں ای احکامات تے عمل پیرا ہوندی سی۔ راہ حق وچ زندگیاں نوں قربان کرن والیاں دی اواز تے پکار اصل وچ حقیقی پکار تے حق دی اواز سی تے جدوں تیکر امت دے اکابرین دی بانسریاں توں حقیقی تے حق تے مبنی سر لوگاں دی سماعتاں نوں چھوندے رہے اودوں تیکر دنیا وچ معتبر صاحب کشف و تصوف تے قابل تقلید ٹھہرے۔ مولانا رومیؒ نوں ویکھو تے مولانا انج دا لفظ توں جیہڑا اج دے کسے مولانا تے پورا نہیں اتردا مولانا اکھوان لئی جیہڑا دستار اے اوہ اج دے ملاواں دے سراں توں بوہت وڈی اے جس دا بوجھ ایہناں دا بھرکس کڈ کے رکھ دیوے گا کیوں جے آدمیت تے بشریت جیہڑی روح توں خالی ہوئے اوہ فضلہ اے ایہہ اوہ بوجھ اے جنہوں دھرتی کسے وی ویلے اپنے اندر نگل لوے گی تے روح دے کردار دی صورت وچ کجھ باقی نہ ہوپائے گا۔ انسان دی کمائی اصل وچ اوہ تذکرہ اے جیہڑا ایس دے بدن دا موت دی آغوش وچ چلے جان دے بعد جاری رہندا اے۔ بدنصیبی نال اسیں ایس معاشرے وچ رہنے آں کہ اسیں اپنی گل وی نہیں کر سکدے۔ ایہہ معاشرت بانسری دی دھن جیہڑا حق دے مونہہ نال جڑی اے تے اپنے سوراخاں توں جیہڑا نغمہ یا نالا بیان کردی اے اوہ نہیں سننا چاہندے بلکہ اقتدار، خوشامد، خود پسندی، خود پرستی، شخصیت پرستی (کردار دی تقلید نہیں) علمیت پرستی، مفاد پرستی، انسان دشمنی، اقتدار پرستی دے مونہہ نال جڑی بانسری دی دھن سننا چاہندے نیں۔ ایہو بانسری ساڈی قوم دی ہن تیکر دی پوری زندگی تے ہاوی رہی۔ میری اپنے قارئین نال گزارش اے کہ بانسری دی جس دھن تے تسیں تے میں سننے آں ایس تے ذرا غور فرمالوئو کہ اوہ کس مونہہ نال جڑی اے۔ 1977ء توں لے کے ہن تیکر دے سیاسی، سماجی، معاشرتی، تجارتی، عدالتی، عسکری، سائنسی تے بین الاقوامی حالات دا باہوش تے حواس خمسہ گواہواں۔اسیں خود پسندی دے نشے دے عادی ہو چکے آں۔ 1977ء توں قوم نوں ایسے دلدل دے پچھے لا دتا جیہڑا دور توں بلکے کجھ قدماں توں پیاس بجھان والا پانی وکھائی دیندی۔ ہر دن اج ایہہ ہوئے گا حکومت جا رہی اے، فلاں دی حکومت آ رہی اے، فلاں ادارے نے فلاں نوں سپورٹ کر دتا اے، فلاں ادارہ دا فلاں بندہ نہیں من رہیا۔ فلاں فلاں دے نال ہو گیا ہن حکومت گئی تے ہن فلاں حکومت آئی۔ ایس تگ و دو وچ دن رات لنگھ رہے نیں قوم ایس عذر وچ مبتلا رہی تے جس دا داء لگیا اوہ مال سمیٹ کے شانت ہوگیا، نہ جانے کنے نوجوان روز گار سرکاری نوکری، انصاف ، میرٹ، مستقبل، لبھدے لبھدے اپنے والدین توں وڈے لگن لگ گئے جدوں وی کسی سیاسی، مذہبی، مسلکی بانسری دی اواز سنی ایس دے نغمے دی محویت وچ گم ہون توں پہلے غور کر لوئو کہ ایس دا دوجا سرا کس دے مونہہ نال جڑیا اے ایہہ حق دا سرا تے دھن سناندی اے یا غلاظت بھرے اقتدار دے ایوان نال جڑی پئی اے لہٰذا بانسری دا دوجا سرا کس مونہہ نال جڑیا اے ایہہ جان لینا فیر بے شک دما دم مست قلندر کر دیو۔
٭٭٭

اپنا تبصرہ گھلو