مشرف غداری کیس دا فیصلہ روکن دی حکومتی عرضی سنوائی لئی مقرر

اسلام آباد: ہائی کورٹ نے حکومت دی درخواست تے سابق صدر پرویز مشرف غداری کیس دا فیصلہ روکن لئی لارجر بنچ تشکیل دے دتا۔

اسلام آباد ہائی کورٹ نے سابق صدر پرویز مشرف دے خلاف غداری کیس دا فیصلہ روکن لئی حکومت ولوں دائر درخواست تے سنوائی لئی لارجر بنچ تشکیل دے دتا اے۔ چیف جسٹس اسلام آباد ہائی کورٹ جسٹس اطہر من اللہ دی سربراہی وچ تن رکنی بنچ درخواست تے اج سماعت کرے گا۔ جسٹس عامر فاروق تے جسٹس محسن اختر کیانی وی بنچ دا حصہ ہون گے۔سرکار نے سابق صدر و آرمی چیف پرویز مشرف دے خلاف غداری کیس دا فیصلہ روکن لئی اسلام آباد ہائی کورٹ وچ درخواست دائر کیتی سی، وزارت داخلہ ولوں دائر درخواست وچ موقف اپنایا گیا اے پرویز مشرف نوں صفائی دا موقع ملن تک خصوصی عدالت نوں کاروائی توں روکیا جاوے تے خصوصی عدالت دا غداری کیس دا فیصلہ محفوظ کرن دا حکم نامہ وی معطل کیتا جاوے۔

درخواست وچ ہور آکھیا گیا اے نویں پراسیکیوشن ٹیم تعینات کرن تک خصوصی عدالت نوں کاروائی توں روکیا جاوے۔

واضح رہوے خصوصی عدالت نے سابق صدر جنرل (ر) پرویز مشرف دے خلاف سنگین غداری کیس دا فیصلہ 19نومبر نوں محفوظ کیتا سی جہڑا 28نومبر نوں سنایا جاوے گا۔