مقبوضہ کشمیر وچ بھارتی جبر جاری، نام نہاد آپریشن وچ 3نوجوان شہید، 5گرفتار

سری نگر: مقبوضہ کشمیر وچ بھارت دا جبر جاری اے، وادی وچ کرفیو تے لاک ڈاؤن نوں 114دیہاڑ ہو گئے۔ ضلع پلوامہ وچ ظالمانہ کاروائی دے دوران تن نوجواناں نوں شہید، سوپور وچ 5کشمیریاں نوں گرفتار کر لیا گیا۔

فورسز دی فائرنگ نال کئی نوجوان زخمی ہو گئے، بھارتی ظلم دے خلاف کشمیری سڑکاں تے نکل آئے۔ مقبوضہ کشمیر وچ بھارت دی فوجی دہشت گردی جاری، ضلع پلوامہ دے علاقے دراب گام وچ بھارتی فوج دی فائرنگ نال تن کشمیری نوجوان شہید ہو گئے۔

بھارتی فوج نے سرچ آپریشن دی آڑ وچ نوجوانا ں نوں شہید کیتا۔ ظالمانہ کاروائی دے خلاف کشمیریاں نے احتجاجی مظاہرے کیتے، بھارت مخالف مظاہریاں تے فائرنگ نال کجھ نوجوان زخمی وی ہو گئے۔ سوپور وچ بھارتی فوج نے 5نوجواناں نوں گرفتار وی کر لیا، بھارتی فوج نے ایل او سی دے نیڑے ٹینک شکن میزائل نصب کر دتے۔

اسرائیلی ساختہ 240سپائیک میزائل تے ایہناں دے 12لانچرز نوں ادھم دے فوجی ہیڈ کوارٹر وچ ریسیو کیتا گیا۔مقبوضہ وادی نوں جیل وچ تبدیل ہوئے 114دن ہو گئے، مسلسل پابندیاں دے سامنے کشمیری قوم سیسہ پلائی دیوار بنی کھڑی اے۔

اپنا تبصرہ گھلو