آصف زرداری دی طبی بنیاداں تے ضمانت منظور، رہائی دا حکم

اسلام آباد ہائی کورٹ نے سابق صدر آصف زرداری دی طبی بنیاداں تے ضمانت منظور کردیاں اوہناں نوں رہا کرن دا حکم دے دتا اے۔

چیف جسٹس اطہر من اللہ تے جسٹس عامر فاروق تے مشتمل اسلام آباد ہائی کورٹ دے دو رکنی خصوصی بنچ نے میگا منی لانڈرنگ تے پارک لین کیساں وچ آصف زرداری تے فریال تالپور دی درخواست ضمانت دی سماعت کیتی۔ نیب پراسیکیوٹر جہانزیب بھروانہ تے آصف زرداری دے وکیل فاروق ایچ نائیک پیش ہوئے۔ عدالت دے حکم تے نیب پراسیکیوٹر جہانزیب بھروانہ نے آصف زرداری دی میڈیکل رپورٹ پڑھ کے سنائی۔ میڈیکل بورڈ دی رپورٹ وچ آکھیا گیا آصف زرداری دل دے عارضے سنے وکھ وکھو قسم دی بیماریاں وچ مبتلا نیں، اوہناں نوں شوگر دی بیماری وی لاحق اے۔

عدالت نے دوواں مقدمات میگا منی لانڈرنگ تے پارک لین کیساں وچ آصف زرداری دی طبی بنیاداں تے درخواست ضمانت منظور کردیاں اک اک کروڑ روپے دے مچلکے جمع کران دا حکم دتا۔ فریال تالپور دی ضمانت دی درخواست تے نیب نے جواب جمع نہ کرایا جہدے تے اسلام آباد ہائی کورٹ نے نیب نوں جواب جمع کران لئی ویلا دیندیاں فریال تالپور دی درخواست تے سماعت 17دسمبر تک ملتوی کر دتی۔