خطے وچ کشیدگی نہیں چاہندے، پاکستان کسے جنگ دا حصہ نہیں بنے گا: دفتر خارجہ

اسلام آباد: ترجمان دفتر خارجہ آکھیا اے پاکستان نوں امریکا ایران صورتحال تے تحفظات نیں، خطے وچ کشیدگی نہیں چاہندے، وزیراعظم نے واضح کیتا پاکستان کسے جنگ دا حصہ نہیں بنے گا، آس اے دوواں ملکاں وچکار تناؤ و چ کمی آوے گی۔

ترجمان دفتر خارجہ عائشہ فاروقی نے ہفتہ وار بریفنگ دیندیاں آکھیا خطے وچ کشیدہ صورتحال دا جائزہ لے رہے آں، خطے وچ قیام امن لئی کوششاں جاری رکھاں گے، وزیراعظم نے وزیر خارجہ نوں متعلقہ وزرائے خارجہ نال رابطے دی ہدایت کیتی اے، وزیر خارجہ نے وکھو وکھ ملکاں دے وزرائے خارجہ نال رابطہ کیتا اے، عراق دا سفر کرن والیاں لئی ہدایت نامہ جاری کیتا۔

مقبوضہ کشمیر دی صورتحال تے عائشہ فاروقی دا کہنا سی کشمیر وچ لاک ڈاؤن نوں 158دیہاڑ ہو گئے، 80لکھ کشمیریاں دے دنیا نال رابطے کٹے ہوئے نیں، وزیراعظم نے دنیا نوں مقبوضہ کشمیر دی صورتحال توں آگاہ کیتا، مقبوضہ کشمیر وچ غذائی قلت پیدا ہو چکی جد کہ ذرائع مواصلات بند نیں۔ اوہناں آکھیا پاکستان مخالف بھارتی پروپیگنڈے نوں رد کرنے آں، کرتاپور راہداری کھولنا وزیراعظم دا وژن ظاہر کردا اے۔