قومی اسمبلی اجلاس وچ تریخی قنون سازی، سرکار نے 6بل فوری منظور کر لئے

اسلام آباد: قنون سازی لئی سرکار تے اپوزیشن اک پیج تے آ گئے، قومی اسمبلی وچ زینب الرٹ بل سنے 6بلز منظور کر لئے گئے، سرکار نے آرڈیننسز واپس لے کے بل دی صورت وچ منظوری لئی پیش کیتے۔

سپیکر اسد قیصر دی زیر صدارت قومی اسمبلی دا اجلاس شروع ہویا تے وزیر مملکت علی محمد خان نے نیب سنے 6آرڈیننس واپس لین دی تحریک پیش کیتی جہنوں ایوان نے منظور کر لیا۔

ایہدے بعد ایوان نے وراثتی سرٹیفکیٹ بل، قنونی معاونت و انصاف بل، اعلیٰ عدلیہ وچ لباس، عورتاں دے جائیداد دے بلز، معذور بندیاں دی فلاح و بہبود تے حقوق بارے بلز کثرت رائے نال منظور کر لئے جد کہ نیب ترمیمی بل تے بے نامی لین دین بارے 2بلز ہور غور لئی متعلقہ قائمہ کمیٹی نوں گھل دتے گئے۔

جماعت اسلامی دے مولانا عبدالاکبر چترالی نے آرڈیننسز دی واپسی تے احتجاج کردیاں ہوئیاں آکھیا اسیں سلیکٹڈ نہیں، سرکار تے اپوزیشن نے سانوں مذاکراتی عمل وچ اعتماد وچ نہیں لیا۔ قومی اسمبلی دا اجلاس پیر دی شام چار وجے تک ملتوی کر دتا گیا۔