پرویز مشرف کیس، اعانت جرم وچ پوری فوج نوں رگڑ دتا گیا، لہور ہائیکورٹ

لہور ہائیکورٹ نے پرویز مشرف کیس وچ ریمارکس دتے نیں کہ اعانت جرم وچ پوری فوج نوں رگڑ دتا گیا۔ لہور ہائی کورٹ وچ پرویز مشرف دا ٹرائل کرن والی خصوصی عدالت دی تشکیل دے خلاف پرویز مشرف دی درخواست تے سماعت ہوئی۔

جسٹس مظاہر علی اکبر نقوی نے ریمارکس دتے ایس فیصلے نوں پڑھو تے ایہدے وچ اعانت جرم دا ذکر کیتا گیا، اعانت جرم وچ پوری فوج دے لوکاں نوں رگڑ دتا گیا اے، ایس طرح تے اوس ویلے دی عدلیہ دے حلف لین والے وی شامل ہو جان گے۔ علی ظفر ایڈووکیٹ آکھیا غداری اک بندہ نہیں کر سکدا ایہ جرم مجموعی طور تے لیا جا سکدا اے، ایہ رشوت والے قنون دی طرح لیا جا سکدا اے رشوت دین تے لین والا دوواں جرم دار نیں۔

جسٹس مظاہر علی اکبر نقوی آکھیا فرد جرم وچ تے غداری دا ذکر ای نہیں اے، جنی سمریز موجود نیں ایہناں وچ ملزماں دا لفظ اے کسے تھاں اک بندے دا ذکر نہیں اے۔ عدالت نے پچھیا جے جرم وفاقی حکومت دے ساہمنے ہو رہیا اے تے کیہ وفاقی حکومت شکایت درج کیتی جا سکدی اے۔

عدالتی معاون علی ظفر ایڈووکیٹ نے دلائل دتے غیر قنونی اقدامات دی لسٹ بھری پئی اے۔ آرمی عدالتاں دا قیام وی غیر قنونی اقدام وچ آندا اے پر غداری نہیں۔ عدالت نے کیس دی سماعت 13جنوری پیر تک ملتوی کردیاں ایڈیشنل اٹارنی جنرل اشتیاق احمد خان نوں دلائل لئی طلب کر لیا تے وزارت داخلہ دی خصوصی عدالت دی تشکیل دی سمری وی منگ لئی۔