اتحادیاں دے تحفظات، حکومتی مذاکراتی کمیٹی دی کل ق لیگی قیادت نال ملاقات ہووے گی

اسلام آباد: اتحادیاں دے تحفظات در کرن لئی حکومت متحرک، اتحادیاں دے نال ملاقاتاں تے رابطیاں وچ تیزی آ گئی۔ حکومتی کمیٹی کل ق لیگ دی قیادت نال وی ملاقات کرے گی۔

ق لیگ دی قیادت نال ملاقات وچ وزیراعلیٰ پنجاب عثمان بزدار، جہانگیر ترین تے پرویز خٹک شریک ہون گے۔

جہانگیر ترین نے بلوچستان نیشنل پارٹی (مینگل) نال وی رابطہ کیتا اے جہدے بعد حکومتی کمیٹی تے بی این پی مینگل وچ جلد ملاقات متوقع اے۔ حکومتی ذرائع دے مطابق لاپتہ کارکناں بارے بی این پی دے مطالبہ تے عملدرآمد جلد شروع ہووے گا جد کہ بی این پی دے تجویزکیتے ترقیاتی منصوبیاں لئی فنڈز وی فراہم کر دتے جان گے۔

دوجے پاسے ایم کیو ایم پاکستان دے ترجمان نے ایس خبر دی تردید کر دتی اے کہ خالد مقبول صدیقی حکومتی ٹیم یاں وزیراعظم نال ملاقات لئی اسلام آباد آ رہے نیں۔ ترجمان نے واضح کیتا ایم کیو ایم نال جہڑی وی ملاقات ہووے گی اوہ کراچی وچ ای ہووے گی۔

اپنا تبصرہ گھلو