سپریم کورٹ : پی آئی اے ملازماں دی جعلی ڈگری بارے مقدمیاں دی تفصیل طلب

اسلام آباد: سپریم کورٹ نے پی آئی اے ملازماں دی جعلی ڈگری بارے مقدمیاں دی تفصیل طلب کر لئی۔ چیف جسٹس گلزار احمد نے ریمارکس دتے جعلی ڈگری والے ملازماں نوں اک اک کرکے کڈھاں گے۔

سپریم کورٹ وچ چیف جسٹس گلزار احمد دی سربراہی وچ تن رکنی بنچ نے پی آئی اے نجکاری تے خسارہ کیس دی سماعت کیتی۔ پی آئی اے دے وکیل نعیم بخاری نے آگاہ کیتا پی آئی اے تے 426ارب روپے دا قرض ہو گیا، نویں انتظامیہ قومی ایئر لائن دی بحالی تے خسارہ گھٹ کرن لئی کوشاں اے پر سندھ ہائی کورٹ نے موجودہ ایم ڈی ارشد محمود نوں کم توں روک دتا اے۔

چیف جسٹس نے ریمارکس دتے پی آئی اے دی بساط نہیں سی تے قرض کیوں لیا، ایئر لائن دی نجکاری دیاں خبراں قومی ادارے دے نال مذاق اے، نظراں پی آئی اے دی نجکاری تے نہیں سگوں نیویارک تے نیں،اک جہاز لئی 700ملازم کم کردے نیں، ریاستی ادارے نوں بند ہون نہیں دیواں گے۔

چیف جسٹس نے استفسار کیتا پی آئی اے نویں جہاز خرید رہیا اے یاں نہیں، وکیل نعیم بخاری نے جواب دتا نویں جہاز خریدن لئی پیسے ای نہیں، جہدے تے چیف جسٹس نے ریمارکس دتے جعلی ڈگری والے جہاز چلا رہے نیں، ایہناں دے مقدمات ایتھے سناں گے۔ سابق معاون خصوصی شجاعت عظیم دی استدعا تے عدالت نے اٹارنی جنرل نوں آڈٹ رپورٹ دا جائزہ لے کے رپورٹ طلب کرلئی، کیس دی سنوائی چار ہفتیاں بعد دوبارہ ہووے گی۔