سندھ کابینہ دا ہنگامی اجلاس، غلام قادر تھیبو نوں آئی جی لان دی منظوری

کراچی: سندھ کابینہ دے ہنگامی اجلاس وچ آئی جی سندھ ڈاکٹر کلیم امام نوں ہٹان تے اوہناں دی تھاں غلام قادر تھیبو نوں لان دی منظوری دے دتی گئی اے۔

تفصیل دے مطابق وزیراعلیٰ سندھ سید مراد علی شاہ دی زیر صدارت ہون والے کابینہ اجلاس وچ نویں آئی جی لئی غلام قادر تھیبو دے ناں دی منظوری دتی گئی اے۔

نویں آئی جی دی تقرری لئی وفاق نوں خط لکھیا جاوے گا۔ اجلاس وچ کابینہ اراکین نے غلام قادر تھیبو دے ناں تے اتفاق کیتا۔ ارکان دا کہنا سی غلام قادر تھیبو چنگی شہرت دے افسر نیں، جہناں نے سندھ وچ وکھو وکھ عہدیاں تے کم کیتا اے۔

وزیراعلیٰ سندھ دا کہنا سی پلس نوں سیاسی نہیں بنانا چاہندے۔ پلس دے کمانڈر نوں سیاسی بیانات نہیں دینے چاہیدے۔ وزیراں دا کہنا سی جہڑے ایس ایس پی یاں پلس افسر نوں سیاست دا شوق اے، اوہ سیاست کرے۔ صوبائی کابینہ اجلاس دے بعد میڈیا نوں بریفنگ وچ وزیر اطلاعات سعید غنی دا کہنا سی اج صرف اک نکاتی ایجنڈے تے ساڈی میٹنگ ہوئی جو آئی جی کلیم امام دی تبدیلی سی۔

کابینہ نے اوہناں نوں ہٹان دی منظوری دے تی اے۔ سعید غنی آکھیا آئی جی سندھ کلیم امام نے غیر ذمہ دارانہ بیانات وی دتے۔ آخری خط وچ اوہناں دس دتا گیا سی کہ تسیں قوانین دی خلاف ورزی کر رہے او۔ اوہناں آکھیا وفاقی حکومت نوں جے کوئی افسر لینا ہووے یاں دینا ہووے تے صوبائی حکومت نال رابطہ کیتا جاندا اے۔ سندھ وچ لاء ان آرڈر دی صورتحال خراب ہو گئی اے۔ کلیم امام دے خلاف ڈسپلنری کاروائی کیتی جانی چاہیدی اے۔

اپنا تبصرہ گھلو