اثاثیاں دی تفصیلات جمع نہ کران دی سزا، 318اراکین اسمبلی و سینیٹ دی رکنیت معطل

اسلام آباد: الیکشن کمیشن نے گوشواریاں دی تفصیلات جمع نہ کران تے قومی اسمبلی، سینیٹ تے چاراں صوبائی اسمبلیاں دے کل 318اراکین دی رکنیت معطل کر دتی اے۔

الیکشن کمیشن آف پاکستان ولوں جہڑے اراکین دی رکنیت معطل کیتی گئی اے اوہناں وچ وفاقی وزیر فواد چودھری، فروغ نسی، نور الحق قادری تے طارق بشیر چیمہ وی شامل نیں۔ معطل شدہ پارلیمنٹرینز اسمبلی اجلاس تے قنون سازی وچ حصہ نہیں لے سکن گے۔

الیکشن کمیشن دے مطابق قومی اسمبلی دے 70 تے سینیٹ دے 12 اراکین دی رکنیت معطل کیتی گئی اے۔

گوشوارے جمع نہ کروان تے پنجاب اسمبلی دے 115، سندھ اسمبلی 40، خیبر پختونخوا اسمبلی 60 تے بلوچستان اسمبلی دے 21 ممبران دی رکنیت وی معطل کر دتی گئی اے۔ الیکشن کمیشن نے فیصلے توں پارلیمنٹ تے چاراں صوبائی اسمبلیاں دے سیکرٹریاں نوں آگاہ کر دتا اے۔

رکنیت معطل ہون والیاں وچ سابق وزیراعظم راجا پرویز اشرف، رکن قومی اسمبلی صداقت عباسی، عامر کیانی، فرخ حبیب، راجا ریاض، عامر لیاقت حسین، عالمگیرخان، عبدالقادر پٹیل تے برجیس طاہر وی شامل نیں۔