کرپٹ پاکستان دفن ہو چکیا، شفاف پاکستان پروان چڑھ رہیا اے: عثمان بزدار

لہور: وزیراعلیٰ پنجاب عثمان بزدار آکھیا اے ماضی دا کرپٹ پاکستان دفن ہو چکیا تے ہن وزیراعظم عمران خان دی قیادت وچ شفاف پاکستان پروان چڑھ رہیا اے۔

وزیراعلیٰ ہاؤس وچ عثمان بزدار تے گورنر پنجاب چودھری سرور وچکار ون ٹو ون ملاقات ہوئی جہدے وچ (ق) لیگ نال مذاکرات سنے دوجے معاملات تے مشاور کیتی گئی۔

ایس موقع تے عثمان بزدار آکھیا مہنگائی تے قابو پان لئی انتظامیہ نوں متحرک کر دتا اے، عام بندے نوں ریلیف دی فراہمی لئی کوئی کسر نہیں چھڈاں گے۔

وزیراعلیٰ دا کہنا سی ماضی دا کرپٹ پاکستان دفن ہو چکیا، ہن وزیراعظم عمران خان دی قیادت وچ شفاف پاکستان پروان چڑھ رہیا اے، ساڈا ہر قدم عوام دی فلاح و بہبود لئی اٹھ رہیا اے۔

اوہناں ہور آکھیا اپوزیشن دے کول کرپشن بچاؤ دے سوا کوئی ایجنڈا نہیں، سیاسی یتیماں نوں پہلاں دی طرح ہن وی نکامی دا ساہمنا کرنا پوے گا، کسے نوں فلاح عامہ دے اقدامات وچ رخنہ نہیں پان دیواں گے، اسیں رل کے صوبے دے عوام دی خدمت دے سفر نوں اگے ودھانا اے۔