خواجہ برادران دے خلاف وعدہ معاف گواہ قیصر امین بٹ دے وارنٹ گرفتاری جاری

لہور: احتساب عدالت نے خواجہ برادران دے خلاف وعدہ معاف گواہ بنن والے قیصر امین بٹ دے وارنٹ گرفتاری جاری کردیاں 24فروری نوں گرفتار کرکے پیش کرن دا حکم دے دتا۔ احتساب عدالت نے پیراگون ہاؤسنگ ریفرنس تے خواجہ سلمان رفیق نوں جوڈیشل ریمانڈ مکمل ہون دے بعد عدالت دے ساہمنے پیش کیتا گیا۔

احتساب عدالت دے جج جواد الحسن نے کیس دی سماعت کیتی۔ عدالت نے دوران سماعت جیل حکام توں پچھیا کہ خواجہ سعد رفیق کدھر اے جہدے تے جیل حکام نے دسیا کہ سعد رفیق اسلام آباد قومی اسمبلی دے سیشن وچ مصروف نیں۔ عدالت نے نیب پراسیکیوٹر توں استفسار کیتا کہ قیصر امن بٹ کتھے نیں اوہناں دا بیان اج قلمبند کرنا اے جہدے تے نیب پراسیکیوٹر آصف ممتاز نے جواب دتا اوہ بیمار نیں اوہناں دی میڈیکل رپورٹاں موجود نیں۔

عدالت نے سخت اظہار برہمی کردیاں قیصر امین بٹ دے وارنٹ گرفتاری جاری کر دتے تے اگلی سماعت تے گرفتار کرکے عدالت وچ پیش کرن دا حکم دے دتا۔ عدالت نے خواجہ برادران دے جوڈیشل ریمانڈ وچ 24فروری تک توسیع کر دتی۔