عورتاں دے مقدمیاں وچ عورت ای تفتیش کرے، سپریم کورٹ دا حکم

اسلام آباد: سپریم کورٹ نے حکم دتا اے عورتاں دے مقدمیاں وچ عورت ای تفتیش کرے، ایس او پی دا اردو ترجمہ سارے ایس ایچ اوز تک اپڑایا جاوے۔ عدالت نے آئی جی پنجاب نوں سارے تھانیاں وچ حکم آویزاں کرن دی ہدایت کردتی۔

آئی جی نوں آئی جی صاحب کہن تے جسٹس قاضی فائز عیسیٰ نے ایس پی دی سرزنش کر دتی۔ جسٹس قاضی فائز عیسیٰ آکھیا آئی جی صاحب کوئی نہیں ہوندا آئی جی صرف آئی جی ہوندا، دنیا وچ کدھرے آئی جی نوں آئی جی صاحب نہیں آکھیا جاندا، اسیں1947وچ آزادی حاصل کر لئی سی، پلس اجے تک انگریز دے دور وچ اے۔ سپریم کورٹ نے خاتون دے کیس وچ مرد انویسٹی گیشن افسر مقرر کرن تے وی اظہار برہمی کردیاں آکھیا ایس او پی دے مطابق عورتاں دے مقدمیاں وچ خاتون افسر تفتیش کر سکدی اے، کیہ ایس پی اپنے ماتحت جہنوں اوہ آپ تعینات کردا شوکاز نوٹس جاری کر سکدا۔

سرکاری وکیل نے آکھیا ایس پی شوکاز نوٹس نہیں جاری کر سکدا، شوکاز نوٹس واپس لے لین گے۔ سپریم کورٹ نے مرد آئی او مقرر کرن تے متعلقہ تھانے دے ایس ایچ او دے خلاف کاروائی دا حکم دیندیاں گوجرانوالہ وچ خلع دے بعد اغوا ہون والی خاتون دی درخواست نبیڑ دتی۔