پاکستان بحریہ دی میری ٹائم مشق سی سپارک 2020ء دا کراچی وچ آغاز

کراچی: پاکستان بحریہ دی اہم میری ٹائم مشق سی سپارک 2020ء دا کراچی وچ آغاز ہو گیا اے۔ ہر دو سال وچ منعقد کیتی جان والی ایس مشق دا مقصد پاک بحریہ دی جنگی تیاریاں دا جائزہ تے ابھردے ہوئے علاقائی تے عالمی چیلنجاں دے ضمن وچ پاکستان بحریہ دے آپریشنل منصوبیاں دی توثیق کرنا اے۔

چیف آف دی نیول سٹاف ایڈمرل ظفر محمود عباسی نے تقریب وچ بطور مہمان خصوصی رلت کیتی۔ ڈپٹی چیف آف دی نیول سٹاف (آپریشنز) نے اپنے افتتاحی کلمات وچ مشق دا تفصیلی جائزہ پیش کیتا۔

اوہناں نے ایس امر دی یقین دہانی کروائی کہ پاک بحریہ امن تے جنگ دے دوران قومی بحری مفادات دے تحفظ لئی جنگی اعتبار نال تیار تے پوری طرح پرعزم اے۔

اوہناں ہور آکھیا مشق سی سپارک 20محفوظ تے پائیدار سمندری ماحول نوں فروغ دے کے خطے دے امن و استحکام نوں برقرار رکھن دے پاکستان دے عزم نوں تقویت بخشے گی۔

بعدوں فورس کمانڈرز نے مشق دے آپریشنل منصوبیاں دے حوالے نال بریفنگ دتی۔

مشق سی سپارک 2020 بحیرہ عرب وچ جیونی توں سرکریک تک پاکستان دی ساحلی پٹی تے منعقد کیتی جاوے گی۔

مشق وچ پاک بحریہ دے سارے پلیٹ فارمز، اثاثہ جات، سپیشل فورسز تے پاک میرینز دے وکھو وکھ دستے، پاکستان میری ٹائم سکیورٹی ایجنسی (پی ایم ایس اے)، پاک فوج تے پاک فضائیہ دے اثاثے تے نمائندگان وی شریک نیں۔

وزارت دفاع، خارجہ امور، توانائی، وزارت داخلہ تے وزارت خزانہ دے عہدیدار وی ایس مشق دا حصہ نیں۔