سراج الحق دا 20فروری توں مہنگائی دے خلاف احتجاجی تحریک دا اعلان

لہور/اسلام آباد: امیر جماعت اسلامی سینیٹر سراج الحق آکھیا اے مہنگائی نال ملک دیوالیہ، تبدیلی دا نعرہ قبر دے سکون تے دفن ہو گیا۔

اوہناں نے اعلان کیتا 20فروری توں مہنگائی تے بیروزگاری دے خلاف ملک گیر احتجاجی تحریک شروع کر رہے آں۔ سینیٹر سراج الحق نے نیشنل پریس کلب اسلام آباد دے ساہمنے مہنگائی و بیروزگاری دے خلاف مظاہرے نال خطاب کردیاں آکھیا حکومت عوام نوں سبسڈی نہیں، دھوکہ دے رہے، ڈاکٹر، مریض، کسان، مزدور اساتذہ، طلباء، ملازمین سب پریشان نیں۔

موجودہ حکومت دے آن دے بعد ساہ لینا اوکھا ہو گیا اے۔ پاکستان دے 22کروڑ عوام شدید معاشی بحران دا شکار نیں۔

اوہناں آکھیا پاکستانیاں لئی ہن پانی پینا وی مشکل ہو گیا اے۔ حکومت نعریاں تے اعلانات تک محدود اے۔

حکومت آئی ایم ایف نال کیتے گئے سارے معاہدے فوری منسوخ کرے۔ حکومت ملک دی جمع پونجی آئی ایم ایف دے حوالے کر رہی اے۔ لوک مہنگائی تے بیروزگاری دے ہتھوں تنگ آ کے خودکشیاں کر رہے نیں۔ لوک کنک، آٹا، چینی تے دال لئی لائن وچ لگے ہوئے نیں۔

اپنا تبصرہ گھلو