سیز فائر خلاف ورزیاں تے بھارتی سفارتکار دی دفتر خارجہ طلبی، شدید احتجاج

اسلام آباد: پاکستان نے بھارتی افواج ولوں سیز فائر دی خلاف ورزیاں تے بھارتی سفارت کار نوں طلب کرکے شدید احتجاج ریکارڈ کرایا اے۔

ترجمان دفتر خارجہ عائشہ فاروقی دے مطابق پچھلے دیہاڑ14فروری نوں لائن آف کنٹرول (ایل او سی) تے نیزا پیر تے رکھ چکری دے علاقیاں وچ بھارتی فوجاں دی بلااشتعال فائرنگ نال 13سالہ کُڑی شدید زخمی ہو گئی۔

دفتر خارجہ نے جنگ بندی دی خلاف ورزی تے بھارت دے سینئر سفارتکار نوں طلب کرکے شدید احتجاج کردیاں آکھیا بھارت مسلسل اشتعال انگیزی دا مظاہرہ کردیاں جنگ بندی معاہدے دی خلاف ورزی کر رہیا اے۔

دفتر خارجہ نے بھارت تے سیز فائر معاہدے دا احترام کرن لئی زور دتا۔

ترجمان دفتر خارجہ دے مطابق بھارت دی اشتعال انگیزی خطے وچ امن و سلامتی لئی خطرہ اے تے بھارت اجہی حرکتاں نال مقبوضہ کشمیر توں دنیا دی توجہ نہیں ہٹا سکدا۔

ترجمان ہور آکھیا بھارت اقوام متحدہ دی سلامتی کونسل دی قرارداداں تے عملدرآمد یقینی بناوے۔