اسلام آباد ہائیکورٹ دا بالاں تے تشدد تے سزا دے خلاف تحریری حکم جاری

اسلام آباد: معروف گلوکار شہزاد رائے دی عرضی تے ہائی کورٹ نے بالاں تے تشدد تے سزا دے خلاف تحریری حکم جاری کر دتا۔ تحریری حکم نامہ دے مطابق اٹارنی جنرل آف پاکستان اگلی سماعت تے عدالتی معاونت کرن، ڈائریکٹر جنرل ایجوکیشن شکایتاں وصول کرن دے حوالے نال میکنزم بنان، پرائیویٹ سکولاں لئی قائم ریگولیٹری باڈی عدالتی ہدایتاں دے مطابق نوٹیفکیشن جاری کرے، سیکرٹری انسانی حقوق یو این کنونشن دے تحت بالاں نوں حاصل حقوق دے قنون تے عملدرآمد رپورٹ جمع کران۔عدالت نے ڈائریکٹر جنرل ایجوکیشن نوں حکم دیندیاں آکھیا وفاقی تعلیمی اداریاں وچ بالاں تے تشدد تے پابندی یقینی بنان۔

آئین دے آرٹیکل 14دے تحت بالاں نوں حاصل حقوق دی خلاف ورزی نہیں ہونی چاہیدی۔ عدالت نے ڈائریکٹر جنرل ایجوکیشن نوں ہدایت کیتی اسلام آباد دے تعلیمی اداریاں وچ جسمانی سزاواں دے حوالے نال شکایتاں دا ازالہ کرن، انسپکٹر جنرل پلس اسلام آباد وی عرضی وچ جواب جمع کران۔ داخلہ، قنون و انصاف، تعلیم دے سیکرٹریز اگلی سماعت تک جواب جمع کران تے رجسٹرار آفس کیس پنج مارچ نوں سماعت لئی مقرر کرے۔

اپنا تبصرہ گھلو