کراچی وچ زہریلی گیس نال ہور 7بندے جاں بحق، ہلاکتاں 14ہو گئیاں

کراچی: کیماڑی دے علاقے وچ زہریلی گیس نال ہور 7بندے جاں بحق ہو گئے جہدے نتیجے وچ ہلاکتاں دی تعداد 14ہو گئی پر تن دن لنگھن دے باوجود ہن تک گیس دے اخراج دے مقام دا سراغ نہیں لایا جا سکیا۔ کراچی دے علاقے کیماڑی وچ زہریلی گیس پھیلن دا معاملہ تشویش ناک صورتحال کر چکیا اے۔ محکمہ صحت سندھ دے فوکل پرسن ڈاکٹر ظفر مہدی نے دسیا زہریلی گیس پاروں تن دن دے دوران ہن تک 14موتاں رپورٹ ہو چکیاں نیں تے 300توں ودھ متاثر نیں۔

ڈاکٹر ظفر مہدی نے دسیا ضیاء الدین ہسپتال کیماڑی وچ 9بندے جاں بحق ہوئے، سول ہسپتال وچ 2، کتیانہ میمن ہسپتال وچ 2تے برہانی ہسپتال وچ اک موت رپورٹ ہوئی۔ کیماڑی وچ علاقہ مکیناں ے گیس پھیلن دے واقعے دے خلاف احتجاج کیتا تے سڑک نوں ٹریفک لئی بند کر دتا۔ احتجاج دی توجہ توں ٹریفک جام ہو گئی تے ٹرکاں، کنٹینراں دی لائناں لگ گئیں۔

مظاہرین نے کراچی پورٹ ٹرسٹ (کے پی ٹی) حکام دے خلاف نعرے بازی کیتی۔ پاکستان اسٹیٹ آئل (پی ایس او)، شیل، ٹوٹل پارکو تے ہیسکول نے عملے دی حفاظت تے صحت دے پیش نظر کیماڑی وچ اپنے آئل سٹوریج ٹرمینلز عارضی طور تے بند کر دتے۔