چودھری شوگر ملز، منی لانڈرنگ کیس: یوسف عباس نوں ضمانت تے رہا کرن دا حکم

لہور: لہور ہائی کورٹ نے چودھری شوگر ملز تے منی لانڈرنگ کیس وچ یوسف عباس نوں ضمانت تے رہا کرن دا حکم دے دتا۔ جسٹس علی باقر نجفی دی سربراہی وچ دو رکنی بنچ نے یوسف عباس دی درخواست ضمانت تے محفوظ فیصلہ سنا دتا۔ دوجے پاسے لہور ہائی کورٹ نے نوازشریف دی میڈیکل رپورٹاں نوں ریکارڈ دا حصہ بنان لئی مریم نواز دی عرضی تے نیب نوں نوٹس جاری کردیاں 25فروری نوں مرکزی کیس وی سماعت لئی مقرر کرن دا حکم دے دتا۔

مریم نواز دی نوازشریف دی تازہ میڈیکل رپورٹاں نوں ریکارڈدا حصہ بنان دی درخواست تے جسٹس علی باقر نجفی تے جسٹس طارق سلیم شیخ تے مشتمل بنچ نے سماعت کیتی۔ مریم نواز نے درخواست وچ وزارت داخلہ، چیئرمین نیب سنے دوجیاں نوں فریق بنایا۔ نیب پراسیکیوٹر نے دسیا مریم نواز سزا یافتہ نیں، ایس لئی اوہناں نوں بیرون ملک جان توں روکیا گیا۔ لیگی رہنما دے وکیل نے دسیا مریم نواز نوں سزا یافتہ ہون دی وجہ توں نہیں روکیا گیا، مریم نواز دا احتساب عدالت لہور وچ کیس زیر سماعت اے، اوہناں نوں چار یاں چھ ہفتیاں لئی اک واری بیرون ملک جان دی اجازت دتی جاوے۔