کشمیر سنے ہر تھاں بنیادی انسانی حقوق دا احترام ہونا چاہیدا اے: انتونیو گوتریس

لہور: اقوام متحدہ دے سیکرٹری جنرل انتونیو گوتریس آکھیا اے صرف پنج ملکاں دے کول ویٹو پاور ہونا دنیا وچ عدم مساوات دی مثال اے جد کہ کشمیر سنے ہر تھاں بنیادی انسانی حقوق دا احترام ہونا چاہیدا اے۔ سیکرٹری جنرل اقوام متحدہ انتونیو گوتریس نے لہور وچ لمز یونیورسٹی وچ طلباء نال خطاب کردیاں آکھیا عالمی سطح تے وی ملکاں وچ مساوات نہیں اے جہدی مثال ایہ اے کہ سلامتی کونسل دے صرف پنج ملکاں دے کول ویٹو پاور اے، بندیاں تے ملکاں وچ مساوات قائم کرنا آسان نہیں سگوں طویل عمل اے۔

انتونیو گوتریس آکھیا اداریاں وچکار مکالمے دا ہونا ضروری اے، آزادی اظہار رائے، خوراک، رہائش تے سیاسی حقوق وی انسانی حقوق دا حصہ نیں، میں اپنے دورے وچ کشمیر دی گل وی کیتی اے، بنیادی انسانی حقوق دا ہر تھاں احترام ہونا چاہیدا اے۔ انتونیو گوتریس دا کہنا سی اج دے دور دا سب توں وڈا مسئلہ ماحولیاتی آلودگی اے جہنوں ساہمنے رکھدیاں ہوئیاں فیصلے کرنے ہون گے، پلاسٹک بیگز زمین دی زرخیزی وچ کمی تے سمندری آلودگی دی وجہ نیں، اک واری استعمال ہون والے پلاسٹک پراڈکٹس تے پابندی لئی کم کر رہے آں۔