خیبر پختونخوا اسمبلی وچ ہنگامہ آرائی، حکومتی تے اپوزیشن ارکان آپس وچ گتھم گتھا

پشاور: خیبر پختونخوا اجلاس اک واری فیر ہنگامہ آرائی دی نذر ہو گیا۔ اراکین نے اک دوجے نوں دھکے دتے تے سپیکر ڈائس دا گھیراؤ کر لیا۔ تفصیل دے مطابق خیبر پختونخوا اسمبلی دا اجلاس سپیکر مشتاق غنی دی صدارت وچ شروع ہویاتے حکومتی تے اپوزیشن اراکین وچکار تلخ کلامی شروع ہو گئی۔ اپوزیشن اراکین نے بنچاں تے کھلو کے ڈیسک وجان شروع کر دتے۔ اپوزیشن نے سپیکر ڈائس دا گھیراؤ کیتا تے حکومتی اراکین وی اپڑ گئے۔

اوتھے موجود سکیورٹی اہلکاراں نے صورتحال نوں کنٹرول کرن دی کوشش کیتی۔ ایس موقع تے حکومتی رکن فضل حکیم تے اپوزیشن ممبر بہادر خان وچ ہاتھا پائی شروع ہو گئی۔ صوبائی وزیر شوکت یوسفزئی نے بیچ بچاؤ کران دی کوشش کیتی۔ رکن اسمبلی نگہت اورکزئی اپنے ڈیسک تے بدستور کھڑی رہیاں تے سپیکر مشتاق غنی نے اوہناں نوں تنبیہ کردیاں آکھیا جے ایس طرح رویہ رکھیا تے میرے کول اختیار اے تہانوں پورے سیشن لئی معطل کر سکنا آں۔

اپوزیشن اراکین غیر ذمہ دارانہ رویہ نہ اپنان تے اپنے حلف دی پاسداری کرن۔ اجلاس وچ ہنگامہ آڑائی دے دوران ای وزیر قنون سلطان محمد نے حصول اراضی ترمیمی بل پیش کیتا جہنوں منظور کر لیا گیا۔ سپیکر نے اجلاس جمعے دے دیہاڑ تک ملتوی کر دتا۔