عدلیہ طاقتور تے کمزور لئی وکھرے قنون دا تاثر ختم کرے: وزیراعظم

اسلام آباد/حویلیاں: وزیراعظم عمران خان دا کہنا اے عدلیہ طاقتور تے کمزور لئی وکھرے قنون دا تاثر ختم کرے۔ ہزارہ موٹروے فیز 2منصوبے دی افتتاحی تقریب نال خطاب کردیاں وزیراعظم عمران خان دا کہنا سی پچھلے دناں کنٹینر تے اک سرکس ہویا، ساڈی کابینہ وچ کجھ لوکاں دے دل کمزور نیں، اوہ گھبرا گئے پر میں آکھیا ایہ اک مہینہ کنٹینر تے گزار دین میں اوہناں دیاں ساریاں گلاں من جاواں گا، اسیں 126دن دھرنے وچ گزارے، میں جاننا آں کہ کنٹینر تے دھرنا کیہ ہوندا اے، دھرنے دا کوئی مقصد یاں نظریہ ہوندا اے۔ وزیراعظم دا کہنا سی اک بندہ جہڑا اپنے آپ نوں مولانا کہندا اے، ڈیزل دے اک پرمٹ تے وکن والا دین تے سیاست کر رہیا اے، میں ایہناں توں کیہ انتقام لینا اے، مینوں مولانا دی آخرت دی فکر اے۔ اوہناں داکہنا سی کنٹینر تے بیروزگار سیاستدان کھڑے سن، جناں وڈا مجرم سی کنٹینر تے کھڑا ہو کے اوناں رولا پا رہیا سی پر میرا اللہ نال وعدہ اے اک بندے نوں وی نہیں چھڈاں گا جہنے پاکستان نوں لٹیا۔وزیراعظم آکھیا ملک وچ بھیڑا ویلا پچھلے حکمراناں دی وجہ توں اے، بدعنوان ٹولے تے پاکستان دے مفادات وکھرے وکھرے نیں پر میں مافیا دا مقابلہ کرن دا سپیشلسٹ آں، مینوں ہارنا وی آندا اے تے جتنا وی۔ اوہناں آکھیا بلاول بھٹو لبرل نہیں سگوں لبرلی کرپٹ نیں جد کہ کابینہ دے زیادہ تر وزراء نوازشریف نوں باہر گھلن دے حق وچ نہیں سن پر اسیں عدالت دا فیصلہ قبول کرنے آں۔ وزیراعظم عمران خان دا کہنا سی اسیں صرف اوہناں توں 7ارب منگے، اوہناں کول ایناں پیسہ اے کہ ایہ 7ارب ٹپ وچ دے دین، نوازشریف دے پتر باہر بھجے ہوئے نیں جد کہ شہباز شریف کہندے نیں میں ضمانت دیواں گا، اوہناں نوں ہالی ووڈ وچ ہونا چاہیدا اے، شہباز شریف تے کرپشن دے کیسز چل رہے نیں اوہناں دی ضمانت کون دیوے گا، شہباز شریف دا پتر تے جوائی دوواں باہر بھجے ہوئے نیں۔وزیراعظم عمران خان دا کہنا سی موجودہ چیف جسٹس تے آن والے چیف جسٹس توں کہنا آں ساڈے دیس نوں انصاف دے کے آزاد کرو، ساڈے دیس دی تریخ رہی اے کہ طاقتور لئی اک قنون تے کمزور لئی اک، طاقتور فون کرکے فیصلے لکھواندے رہے نیں، ملک دی تریخ اے کہ طاقتور نوں قنون ہتھ نہیں لا سکدا ایس لئی موجودہ تے آن والے چیف جسٹس توں درخواست اے کہ اوہ ایس تاثر نوں ٹھیک کرن، ساڈا قنون اجہیا ہووے کہ کمزور توں کمزور وی طاقتور دے ساہمنے کھڑا ہووے تے اوہنوں یقین ہووے کہ انصاف ملے گا۔

اپنا تبصرہ گھلو