مولانا فضل الرحمان دا پلان بی، دیس دے وکھو وکھ شہراں تے دھرنے

اسلام آباد: جے یو آئی (ف) دا پلان بی دے تحت دھرنا جاری اے، کراچی، نوشہرہ، بنوں، ملاکنڈ وچ کارکناں دی چوکھی تعداد وکھو وکھ شاہراہواں تے بیٹھی رہی، راہ بند ہون دی وجہ توں گڈیاں دی لمی لائناں لگیاں رہیاں۔ کراچی وچ جمعیت علمائے اسلام دے کارکناں نے پنجویں دیہاڑ وی حب ریور روڈ تے دھرنا دتا جہدی وجہ توں ٹریفک دی روانی متاثر رہی، گھوٹکی وچ دھرنے دی وجہ توں سندھ پنجاب دوواں پاسیوں ٹریفک معطل رہی جہدے توں مسافراں نوں شدید مشکلات دا ساہمنا رہیا۔ خیبر پختونخوا وچ وی جے یو آئی (ف) دے کارکناں نے پنجویں دیہاڑ وی چار تھاواں تے شاہراہواں نوں بند کیتا، دھرنے دی وجہ توں جی ٹی روڈ نوشہرہ حکیم آباد دے مقام تے ٹریفک دا نظام درہم برہم رہیا۔ بٹگرام، چکدرہ، شاہراہ ریشم تے بنوں انڈس ہائی وے تے وی کارکناں دی چوکھی تعداد نے احتجاج کیتا تے سڑک بلاک کیتی۔ بنوں ہائی وے بند ہون نال وڈیاں گڈیاں دی لمیاں لائناں لگ گئیاں۔ مالانڈ وچ وی جے یو آئی دے دھرنے دی وجہ توں شہریاں نوں مشکلات دا ساہمنا رہیا، صرف ایمبولینس نوں جان دی اجازت دتی گئی۔

اپنا تبصرہ گھلو