سرکار دا نوازشریف بارے فیصلے دے خلاف اپیل نہ کرن دا فیصلہ

اسلام آباد: وفاقی کابینہ نے نوازشریف نوں لندن جان دی اجازت دین دے لہور ہائی کورٹ دے فیصلے دے خلاف اپیل دائر نہ کرن دا فیصلہ کیتا اے۔ وزیراعظم عمران خان دی زیر صدارت وفاقی کابینہ دا اجلاس ہویا جہدے وچ 8نکات دی منظوری دتی گئی۔

کابینہ نے لہور ہائی کورٹ دے فیصلے دے خلاف اپیل دائر کرن تے وی غور کیتا۔ فواد چوہدری تے فیصل واوڈا نے لہور ہائی کورٹ دا فیصلہ چیلنج کرن دا مشورہ دتا پر کابینہ ارکان دی اکثریت نے اپیل دائر کرن دی مخالفت کردیاں آکھیا عدالتاں دے فیصلیاں دا احترام کرنا چاہیدا اے۔

بعض کابینہ ارکان نے آکھیا لہور ہائی کورٹ دے فیصلے تے سپریم کورٹ دی رہنمائی لینا ضروری اے کیوں جے ای سی ایل قنون وچ واضح اے کہ سزا یافتہ بندہ بیرون ملک نہیں جا سکدا۔

بعض وزیراں نے آکھیا نوازشریف نوں طبی بنیاداں تے صرف اک واری بیرون ملک علاج دی اجازت دتی گئی اے تے حکومت نوں چاہیدا اے لہور ہائی کورٹ دے تفصیلی فیصلے دا انتظار کرے۔ کابینہ نے نیشنل ٹیرف پالیسی تے قابل تجدید توانائی پالیسی دی منظوری دتی جد کہ ای سی سی تے کابینہ کمیٹی برائے سی پی دے فیصلیاں دی توثیق کیتی۔ اجلاس وچ وزارتاں، ڈویژن وچ چیف ایگزیکٹو تے ایم ڈیز دی خالی آسامیاں دی رپورٹ وی پیش کیتی گئی۔